Tuesday, April 27, 2010

‘ഈ മന്ത്രിമാര്‍ക്കൊന്നും ഉറക്കമില്ലേ?’

“ഇതെന്താണപ്പാ, പാതിരാത്രിക്കാണോ സഹായവുമായി എത്തുന്നത്?” തിരുവനന്തപുരം ജനറല്‍ ആശുപത്രിയില്‍ തനിക്ക് സഹായധനവുമായി എത്തിയ മന്ത്രി ബേബിയെ കണ്ട് കവി അയ്യപ്പന്‍ ചൊടിച്ചു. കാര്യം ധനസഹായമാണ് എന്നറിയാതെയല്ല. അതൊക്കെ തരുന്നതിന് നേരവും കാലവുമൊക്കെയില്ലേ! മനുഷ്യന്മാര്‍ അസലായി കിടന്നുറങ്ങുന്ന പാതിരാത്രി സമയത്താണോ പണവും കൊണ്ടുവരുന്നത്‌? എന്തായാലും പരാതി കണക്കിലെടുക്കാതെ വെളുക്കെച്ചിരിച്ച് മന്ത്രി ബേബി കവിയുടെ കയ്യില്‍ സര്‍ക്കാരിന്റെ ധനസഹായമായ പതിനായിരം രൂപ ഏല്‍‌പ്പിച്ചു.

മന്ത്രി ഇത്രടം വരെ വന്നതല്ലേ, കയ്യില്‍ തന്നതല്ലേ! പതിനായിരം രൂപാ ഉപേക്ഷിക്കുന്നതെങ്ങിനെ? അയ്യപ്പന്‍ അതുവാങ്ങി. കവിയോട് യാത്ര പറഞ്ഞ് മന്ത്രിയിറങ്ങുമ്പോള്‍ അയ്യപ്പന് വീണ്ടും സംശയം, “ഈ മന്ത്രിമാര്‍ക്കൊന്നും ഉറക്കമില്ലേ?” അപ്പോഴാണ് ആശുപത്രി അധികൃതര്‍ അയ്യപ്പനെ തിരുത്തിയത്, “സാറേ, സമയം പാതിരാത്രിയൊന്നുമല്ല. ഇരുട്ടായിട്ടേ ഉള്ളൂ. സമയമിപ്പോള്‍ ഏഴരയാണ്!”

അതുശരി. അയ്യപ്പന് കാര്യം മനസിലായി. താന്‍ തെറ്റിദ്ധരിച്ചതാണ്. അയ്യപ്പന്‍ തര്‍ക്കിക്കാന്‍ പോയില്ല. ഈയിടെയായി അയ്യപ്പന്‌ സമയബോധം മങ്ങിപ്പോകുന്നു. രാത്രിയില്‍ ഉറക്കവുമില്ല. ഒന്നിനും ഒരു ഓര്‍മയുമില്ല. ആരാണ് തന്നെ ജനറല്‍ ആശുപത്രിയില്‍ എത്തിച്ചത് എന്നുതന്നെ അയ്യപ്പന് ഓര്‍മയില്ല.

തമ്പാനൂരിലെ വഴിയരുകില്‍ അവശനിലയില്‍ കണ്ടെത്തിയ അയ്യപ്പനെ പൊലീസുകാര്‍ ആശുപത്രിയില്‍ ആക്കുകയായിരുന്നു. പേരും ഊരുമൊന്നും അയ്യപ്പന്‍ ആശുപത്രിയില്‍ വെളിപ്പെടുത്തിയില്ല. അവസാനം, ആശുപത്രിയിലെ ശുചീകരണ വിഭാഗം ജീവനക്കാരനായ മഹേഷ് കവിയെ തിരിച്ചറിഞ്ഞു. കവിയാണെന്ന് ആര്‍.എം.ഒയ്ക്ക് മനസിലായതോടെ ജനറല്‍ വാര്‍ഡില്‍ നിന്ന്‌ അയ്യപ്പന് പ്രൊമോഷന്‍ ലഭിച്ചു.

ബുധനാഴ്ച രാത്രി എം.എ. ബേബി ആശുപത്രിയിലെത്തി സഹായധനം നല്‍കി മടങ്ങിയപ്പോള്‍ ആരോ അയ്യപ്പനോട്‌ ചോദിച്ചു: "കാശ്‌ കിട്ടിയപ്പോള്‍ എന്തു തോന്നി?" ഉടന്‍ മറുപടി വന്നു, "വീണ്ടും രോഗം വരട്ടെ; മന്ത്രി വന്ന്‌ വീണ്ടും പണം തരട്ടെ..."

ആശുപത്രിയില്‍ കിടക്കുമ്പോഴും അയ്യപ്പന്റെ അരികില്‍ ഒരു പുസ്‌തകമുണ്ട്‌- സരോജിനി സാഹു എഴുതിയ 'ഇരുണ്ട കൂടാരം.' കണ്ടുനിന്നവര്‍ ചോദിച്ചു, ‘എന്താ അയ്യപ്പാ, ഈ പുസ്‌തകം തെരഞ്ഞെടുത്തത്‌?’

"ഹോ.. അങ്ങനെയൊന്നുമില്ല. ഇതിന്റെ കവര്‍ ഡിസൈന്‍ വളരെ നന്നായിരിക്കുന്നു. അതു കണ്ട്‌ വാങ്ങിയതാ... ഇത് ഞാന്‍ വായിക്കാന്‍ പോകുന്നില്ല. വെറുതെ വച്ചിരിക്കുന്നതാ.. വായിക്കുന്ന പുസ്‌തകം തലയിണയ്ക്കടിയിലുണ്ട്‌," അയ്യപ്പന്‍ തലയിണക്കിടയില്‍ നിന്ന് ഒരു പുസ്തകം എടുത്തു.

ആല്‍ബേര്‍ കാമുവിന്റെ ദി ഔട്ട്‌സൈഡര്‍. ‘നേരത്തേ വായിച്ചതാണ്‌. ഇപ്പോള്‍ വീണ്ടും വായിക്കണമെന്ന് തോന്നി,’ അയ്യപ്പന്‍ വിശദീകരിക്കുന്നു.

“ഔട്ട്‌സൈഡര്‍ ആയെന്നു തോന്നുന്നുണ്ടോ?” വീണ്ടും ആരോ ചോദിക്കുന്നു. ചിരിയോടെയുള്ള അയ്യപ്പന്റെ മറുപടി ഉടന്‍ വന്നു, "ഞാന്‍ പണ്ടേ ഔട്ട്‌സൈഡര്‍ ആയതല്ലേ!"

An interesting meeting with poet Ayyappan | ‘ഈ മന്ത്രിമാര്‍ക്കൊന്നും ഉറക്കമില്ലേ?’

ജഗദീഷ് ടൈറ്റ്‌ലര്‍ക്ക് ക്ലീന്‍ ചിറ്റ്



PTI
സിഖ് വിരുദ്ധ കലാപ കേസില്‍ കോണ്‍ഗ്രസ് നേതാവ് ജഗദീഷ് ടൈറ്റ്‌ലര്‍ക്ക് എതിരെയുള്ള കേസ് അവസാനിപ്പിക്കാനുള്ള സിബിഐ ശ്രമത്തിന് കോടതിയുടെ അംഗീകാരം. ടൈറ്റ്‌ലര്‍ക്ക് എതിരെയുള്ള കേസ് അവസാനിപ്പിക്കുന്നതിന് അനുമതി തേടി സമര്‍പ്പിച്ച റിപ്പോര്‍ട്ട് ന്യൂഡല്‍ഹി അഡീഷണല്‍ മെട്രോപോളിത്തന്‍ മജിസ്ട്രേറ്റ് കോടതി അംഗീകരിച്ചു.

ടൈറ്റ്ലര്‍ക്കെതിരെ വിചാരണ നടത്തുന്നതിന് ആവശ്യമായ തെളിവുകള്‍ ഇല്ല എന്ന് റിപ്പോര്‍ട്ട് പരിഗണിച്ച മജിസ്ട്രേറ്റ് രാകേഷ് പണ്ഡിറ്റ് പറഞ്ഞു. കാലിഫോര്‍ണിയയിലുള്ള സാക്ഷി ജസ്ബീര്‍ സിംഗിന്റെ മൊഴിക്ക് കേസുമായി ബന്ധമില്ല എന്നും സുരീന്ദര്‍ സിംഗ് എന്ന സാക്ഷിയുടെ മൊഴി പരസ്പരവിരുദ്ധമാണെന്നും കോടതി ചൂണ്ടിക്കാട്ടി.

കേസില്‍ ഇനിയുമൊരന്വേഷണത്തിന് കാരണമൊന്നും കാണുന്നില്ല എന്ന് ടൈറ്റ്ലര്‍ക്ക് ക്ലീന്‍ ചിറ്റ് നല്‍കിയ കോടതി വിധിയില്‍ പറയുന്നു.

2007 ഡിസംബറില്‍ ടൈറ്റ്ലര്‍ക്കെതിരെയുള്ള കേസ് അവസാനിപ്പിക്കുന്നതിന് അനുമതി തേടി സിബിഐ സമര്‍പ്പിച്ച അപേക്ഷ കോടതി തള്ളിക്കളഞ്ഞതിനെ തുടര്‍ന്നാണ് പുരന്വേഷണം നടത്തിയത്. ബാദല്‍ സിംഗ് ഉള്‍പ്പെടെ മൂന്ന് സിഖ് വംശജരെ കൊല ചെയ്ത സംഘത്തിന് നേതൃത്വം നല്‍കി എന്നതാണ് ടൈറ്റ്‌ലര്‍ക്കെതിരെയുള്ള കേസ്.

ചാരപ്രവര്‍ത്തനത്തിന് നയതന്ത്രജ്ഞ പിടിയിലായി

പാകിസ്ഥാനു വേണ്ടി ചാരപ്രവര്‍ത്തനം നടത്തിയ ഒരു മുതിര്‍ന്ന ഇന്ത്യന്‍ നയതന്ത്രജ്ഞ അറസ്റ്റിലായതായി റിപ്പോര്‍ട്ടുകള്‍. ഇസ്ലാമബാദിലെ ഇന്ത്യന്‍ ഹൈക്കമ്മീഷനില്‍ പ്രസ് ആന്‍ഡ് ഇഫര്‍മേഷന്‍ സെക്കന്‍ഡ് സെക്രട്ടറിയായി ജോലി നോക്കിയിരുന്ന മാധുരി ഗുപ്തയാണ് പിടിയിലായത്.

കഴിഞ്ഞ 30 വര്‍ഷമായി വിദേശകാര്യമന്ത്രാലയത്തില്‍ ഉറുദു സ്പെഷ്യലിസ്റ്റായി ജോലിനോക്കുന്ന ഇവര്‍ തന്ത്രപ്രധാനമായ വിവരങ്ങള്‍ പാകിസ്ഥാന്റെ ചാരസംഘടനയായ ഐ‌എസ്‌ഐയ്ക്ക് കൈമാറിയതായാണ് ഇന്ത്യന്‍ അന്വേഷണ സംഘം ഭയക്കുന്നത്.

ഇപ്പോള്‍ നടക്കുന്ന സാര്‍ക്ക് സമ്മേളനവുമായി ബന്ധപ്പെട്ട് വിദേശകാര്യമന്ത്രാലയത്തില്‍ നേരിട്ട് റിപ്പോര്‍ട്ട് ചെയ്യണം എന്ന് ആവശ്യപ്പെട്ട് തന്ത്രപൂര്‍വം ഇവരെ ന്യൂഡല്‍ഹിയിലേക്ക് വരുത്തിയാണ് അറസ്റ്റ് ചെയ്തത്. ഡല്‍ഹിയില്‍ എത്തിയതു മുതല്‍ നിരീക്ഷണത്തിലായിരുന്ന മാധുരിയെ ഡല്‍ഹി പൊലീസിന്റെ സ്പെഷ്യല്‍ സെല്ലാണ് അറസ്റ്റ് ചെയ്തത്. റോയും ഐബിയും ഇവരെ ചോദ്യം ചെയ്തുവരുന്നു.

ഔദ്യോഗിക രഹസ്യങ്ങള്‍ വെളിപ്പെടുത്തിയ കുറ്റത്തിനാണ് ഇവരെ അറസ്റ്റ് ചെയ്തത്. കോടതിയില്‍ ഹാജരാക്കിയ മാധുരിയെ പൊലീസ് കസ്റ്റഡിയില്‍ വിട്ടയയ്ക്കുകയായിരുന്നു.

Indian diplomat arrested for spying | ചാരപ്രവര്‍ത്തനത്തിന് നയതന്ത്രജ്ഞ പിടിയിലായി

ഐപിഎല്ലിനെതിരെ മിയാന്‍ദാദ്

ഐപിഎല്ലിന്റെ മേല്‍നോട്ടം ഇന്റര്‍നാഷണല്‍ ക്രിക്കറ്റ് കൗണ്‍സില്‍ (ഐസിസി) ആണ് നടത്തേണ്ടതെന്ന് പാകിസ്ഥാന്‍ ക്രിക്കറ്റ് ടീമിന്റെ മുന്‍ ക്യാപ്റ്റനായ ജാവേദ് മിയാന്‍ദാദ് അഭിപ്രായപ്പെട്ടു.

വന്‍ പണം ഒഴുകുന്ന കളിയായതുകൊണ്ട് തന്നെ ഇത് ബിസിസിഐ അല്ല നോക്കി നടത്തേണ്ടതെന്നാണ് മിയാന്‍ദാദിന്റെ അഭിപ്രായം. ഐപിഎല്‍ ഇന്ത്യയ്ക്ക് ഉള്ളിലെ കളി മാത്രമാണെന്ന വാദമൊന്നും നിലനില്‍ക്കില്ല. വിദേശികളും ഇതില്‍ കളിയ്ക്കുന്നുണ്ട്. ഇതും ഭരണം ഐസിസി ഏറ്റെടുക്കാന്‍ സാഹചര്യം ഒരുക്കുകയാണ്. പാകിസ്ഥാന്‍ ക്രിക്കറ്റ് ബോര്‍ഡിന്റെ ‍ഡയറക്ടര്‍ ജനറലാണ് മിയാന്‍ദാദ്. ഐപിഎല്ലില്‍ ഉണ്ടായിരിയ്ക്കുന്ന സംഭവങ്ങളും ലളിത് മോഡിയുടെ സസ്പന്‍ഷനും തന്നെ ഒട്ടും അമ്പരപ്പിയ്ക്കുന്നില്ലെന്നാണ് ഇദ്ദേഹം പറയുന്നത്.

ബോര്‍ഡിന്റെ നിയന്ത്രണമില്ലാതെ സ്വകാര്യ കമ്പനികള്‍ക്ക് കളിക്കാരുമായി കരാറുണ്ടാക്കാന്‍ അനുമതി നല്‍കിയാല്‍ പ്രശ്നം ഉണ്ടാകും. വേണ്ട നിബന്ധനകള്‍ ഇല്ലാതെ ഇത്തരം സ്വകാര്യ കളി സംരംഭങ്ങള്‍ അനുവദിയ്ക്കരുതെന്ന് താന്‍ ആദ്യം മുതല്‍ തന്നെ ഐസിസിയോട് പറഞ്ഞിരുന്നു. ഏറെ കൊട്ടിഘോഷിയ്ക്കപ്പെട്ട ഐപിഎല്‍ കൊണ്ട് ക്രിക്കറ്റിന് യാതൊരു ഗുണവും ഉണ്ടായിട്ടില്ല. മിയാന്‍ദാദ് പറയുന്നു.


ഐപിഎല്ലിന്റെ മൂന്നാം വര്‍ഷ മത്സരങ്ങളില്‍ പാകിസ്ഥാന്‍ കളിക്കാരാരും ഉണ്ടായിരുന്നില്ല. ഇതാണോ മിയാന്‍ദാദിന്റെ രോഷത്തിന് കാരണമെന്നറിയില്ല. മൂന്നാം മത്സരത്തിന് മുമ്പ് നടന്ന കളിക്കാരുടെ ലേലം വിളിയില്‍ പാകിസ്ഥാനില്‍ നിന്നുള്ള പതിനൊന്ന് കളിക്കാരുണ്ടായിരുന്നു. ഇതില്‍ പാകിസ്ഥാന്‍ ടി20 ടീമിന്റെ ക്യാപ്റ്റനായ ഷാഹിദ് അഫ്രീദിയും ഉണ്ടായിരുന്നു. പക്ഷേ ഒരു ടീം ഉടമസ്ഥരും പാക് കളിക്കാരെ തങ്ങളുടെ ടീമിലേയ്ക്ക് എടുത്തില്ല. ഇതിന്റെ വിദ്വേഷമാണോ ഇപ്പോള്‍ മിയാന്‍ദാദ് തീര്‍ക്കുന്നത്?
http://thatsmalayalam.oneindia.in/news/2010/04/27/miandad-rubbishes-ipl-supervise-icc.html

പിണറായിയെ മമ്മൂട്ടി സ്വാധീനിച്ചു: തിലകന്‍


PRO
തൊഴില്‍‌പരമായ പ്രതിസന്ധി ഉണ്ടായപ്പോള്‍ സി പി എം സംസ്ഥാന സെക്രട്ടറി പിണറായി വിജയന്‍ തനിക്ക് അനുകൂലമായ ഒരു നിലപാടും സ്വീകരിച്ചില്ലെന്ന് നടന്‍ തിലകന്‍. കൈരളി ചാനല്‍ ചെയര്‍മാന്‍റെ സ്വാധീനമായിരിക്കാം ആദ്യകാല കമ്യൂണിസ്റ്റായ തന്നെ തഴഞ്ഞതിന്‍റെ കാരണമെന്നും തിലകന്‍ തുറന്നടിച്ചു.

മുംബൈയില്‍ ഒരു പ്രമുഖ മാധ്യമത്തിന് അനുവദിച്ച അഭിമുഖത്തിലാണ് തിലകന്‍ മമ്മൂട്ടിക്കും പിണറായിക്കുമെതിരെ രംഗത്തെത്തിയത്.

“പിണറായി വിജയനും കൈരളി ചാനലും എനിക്ക് അനുകൂലമായ നിലപാട് സ്വീകരിക്കാന്‍ മടിച്ചതിന് പിന്നില്‍ പല കാരണങ്ങളുണ്ട്. അതിലൊന്ന് കൈരളി ടിവിയുടെ ചെയര്‍മാന്‍റെ സ്വാധീനമായിരിക്കാമെന്നാണ് ഞാന്‍ കരുതുന്നത്. എനിക്ക് തൊഴില്‍ പ്രശ്നമുണ്ടായപ്പോള്‍ സാംസ്കാരികമന്ത്രി എം എ ബേബിയെ ഫോണില്‍ വിളിച്ച് ഞാന്‍ കാര്യങ്ങള്‍ വ്യക്തമാക്കിയിരുന്നു. താന്‍ ഇപ്പോള്‍ കേരളത്തില്‍ ഇല്ലെന്നും പിണറായി വിജയനെ ഇക്കാര്യങ്ങള്‍ ധരിപ്പിക്കാമെന്നും ബേബി എന്നെ അറിയിച്ചു. എന്നാല്‍ പിണറായി എനിക്ക് അനുകൂലമായ ഒരു നടപടിയും സ്വീകരിച്ചില്ല” - തിലകന്‍ പറയുന്നു.

തുണിയുടുക്കാത്തവര്‍ക്ക് സ്വാഗതം!



PRO
ബ്രിട്ടനില്‍ ബ്രിസ്റ്റള്‍ ചാനലിലെ ഫ്ലാറ്റ് ഹോം ദ്വീപിലേക്ക് ആര്‍ക്കും കടന്നുവരാം. പ്രകൃതിഭംഗി ആസ്വദിക്കാം. പക്ഷേ വരുന്നവര്‍ക്ക് ഒരു നിബന്ധന ബാധകമാണ്. തുണിയുടുക്കാന്‍ പാടില്ല! അതേ, പൂര്‍ണ നഗ്‌നരായി വരുന്നവര്‍ക്കു മാത്രമേ അടുത്ത ഒരാഴ്ചക്കാലം ദ്വീപില്‍ പ്രവേശനം അനുവദിച്ചിട്ടുള്ളൂ.

ഇംഗ്ലണ്ടിലെ ന്യൂഡിസ്റ്റ് സംഘടനയാണ് ഈ ‘സ്വാതന്ത്ര്യപ്രഖ്യാപന’ത്തിന് പിന്നില്‍. ധാരാളം വിനോദസഞ്ചാരികള്‍ തുണിയുടുക്കാതെ ഈ ദ്വീപില്‍ എത്തിയിട്ടുണ്ടെന്നാണ് റിപ്പോര്‍ട്ട്. ഇനിയും ആയിരക്കണക്കിന് ആളുകള്‍ ഈ ദ്വീപിലേക്ക് എത്തുകയും ചെയ്യും. എന്തായാലും അടുത്ത ഒരാഴ്ചക്കാലം ദ്വീപ് നഗ്നസൌന്ദര്യത്താല്‍ തിളങ്ങുമെന്ന് സാരം.

1897ല്‍ മാര്‍ക്കോണി എന്ന ശാസ്ത്രജ്ഞന്‍ ആദ്യമായി റേഡിയോ സന്ദേശം അയച്ചത് ഈ ദ്വീപില്‍ നിന്നാണ്. 86 ഏക്കര്‍ വിസ്താരമുള്ള ഈ ദ്വീപ് കള്ളക്കടത്തുകാരുടെയും അധോലോക സംഘങ്ങളുടെയും വിഹാരകേന്ദ്രം എന്ന നിലയിലാണ് ഒരുകാലത്ത് കുപ്രസിദ്ധിയാര്‍ജ്ജിച്ചത്. എന്നാല്‍ പിന്നീട് ഇത് വിനോദസഞ്ചാരികളുടെ ഇഷ്ടസ്ഥലമായി മാറി.


The day strippers! | തുണിയുടുക്കാത്തവര്‍ക്ക് സ്വാഗതം!

ലോകബാങ്കില്‍ ഇന്ത്യയ്ക്ക് ഏഴാം സ്ഥനം

ലോക ബാങ്കിലെ മൂലധന പങ്കാളിത്വത്തില്‍ ഇന്ത്യയ്ക്ക് ഏഴാം സ്ഥാനം. വികസ്വര രാജ്യങ്ങള്‍ക്ക് ലോകബാങ്കില്‍ കൂടുതല്‍ പ്രാധിനിധ്യം നല്‍കിയതിന്റെ ഭാഗമായാണ് ഇന്ത്യയ്ക്ക് ഏഴാം സ്ഥാനം ലഭിച്ചത്. ലോകബാങ്കിന്റെ പ്രവര്‍ത്തന രീതിയും ധനവിനിയോഗവും സംബന്ധിച്ചുള്ള തീരുമാനങ്ങളില്‍ ഇനി ഇന്ത്യയ്ക്കും മുഖ്യ പങ്കുവഹിക്കാനാകും. ഇന്ത്യയ്ക്ക് പുറമെ വികസ്വര രാജ്യങ്ങളായ ചൈനയ്ക്കും ബ്രസീലിനും ലോകബാങ്ക് കൂടുതല്‍ വോട്ടവകാശം നല്‍കി.

ലോകബാങ്കിലെ 186 അംഗരാജ്യങ്ങളില്‍ ഇന്ത്യയുടെ വോട്ടവകാശം 2.77 ശതമാനത്തില്‍ നിന്ന് 2.91 ശതമാനമായാണ് ഉയര്‍ത്തിയിരിക്കുന്നത്. ഏഷ്യയിലെ ഏറ്റവും വലിയ സാമ്പത്തിക ശക്തിയായ ചൈന വോട്ടവകാശത്തില്‍ ജര്‍മ്മനി, ഫ്രാന്‍സ്, ബ്രിട്ടന്‍ എന്നീ രാജ്യങ്ങളെ പിന്നിലാക്കി. ചൈനയ്ക്ക് 4.42 ശതമാനം വോട്ടവകാശമാണ് നല്‍കിയിരിക്കുന്നത്. മുമ്പ് ഇത് ഇന്ത്യക്കൊപ്പം 2.77 ശതമാനമായിരുന്നു.

ലോക ബാങ്കിന്റെ ചരിത്രത്തില്‍ ആദ്യമായാണ് വോട്ടവകാശങ്ങളില്‍ ഭേദഗതി വരുത്തുന്നത്. ലോകബാങ്കിന്റെ പുത്തന്‍ മാറ്റങ്ങളെ വികസ്വര രാജ്യങ്ങള്‍ സ്വാഗതം ചെയ്തു. എന്നാല്‍, ഭാവിയില്‍ രാജ്യങ്ങളുടെ പ്രാതിനിധ്യം കണക്കാക്കുന്നത് ഉത്പാദന ശേഷിയും സാമ്പത്തിക സ്ഥിതിയും അനുസരിച്ചായിരിക്കണമെന്നും ലോകബാങ്ക് വക്താവ് വ്യക്തമാക്കി.

India becomes seventh largest shareholder in World Bank | ലോകബാങ്കില്‍ ഇന്ത്യയ്ക്ക് ഏഴാം സ്ഥനം

ഞാന്‍ രാജസ്ഥാന്‍റെ അംബാസഡര്‍ മാത്രം: ശില്‍പ്പ


IFM
താന്‍ ഐ പി എല്‍ ടീമായ രാജസ്ഥാന്‍ റോയല്‍‌സിന്‍റെ ബ്രാന്‍ഡ് അംബാസഡര്‍ മാത്രമാണെന്ന് ബോളിവുഡ് സുന്ദരി ശില്‍പ്പ ഷെട്ടി. ബി സി സി ഐ പ്രസിഡന്‍റ് ശശാങ്ക് മനോഹര്‍ രാജസ്ഥാന്‍ ടീമിനെപ്പറ്റി ഉയര്‍ത്തിയ ചില ചോദ്യങ്ങളോട് ട്വിറ്ററിലൂടെ പ്രതികരിക്കുകയായിരുന്നു ശില്‍പ്പ.

ശില്‍‌പ്പയുടെയും ഭര്‍ത്താവ് രാജ് കുന്ദ്രയുടെയും പേരുകള്‍ രാജസ്ഥാന്‍ റോയല്‍‌സിന്‍റെ ഓഹരിയുടമകളുടെ പട്ടികയില്‍ ഇല്ലെന്നായിരുന്നു ശശാങ്കിന്‍റെ വെളിപ്പെടുത്തല്‍.

“രാജ് കുന്ദ്രയും ഞാനും രാജസ്ഥാന്‍ റോയല്‍‌സിന്‍റെ ഉടമകളെല്ലന്ന വാര്‍ത്തയാണ് ടി വിയില്‍ നിന്ന് കേട്ടത്. ഞാന്‍ ഈ ടീമിന്‍റെ ബ്രാന്‍ഡ് അംബാസിഡര്‍ മാത്രമാണ്. രാജ് കുന്ദ്രയാണ് ഓഹരിയുടമ. ഇതാണ് സത്യം” - ട്വീറ്റിലൂടെ ശില്‍‌പ്പ വ്യക്തമാക്കുന്നു.

രാജസ്ഥാന്‍ ടീമിന്‍റെ ഒരു ഓഹരിയുടമ ഐ പി എല്‍ മുന്‍ കമ്മീഷണര്‍ ലളിത് മോഡിയാണ് എന്ന ആരോപണമാണ് ആശയക്കുഴപ്പം സൃഷ്ടിച്ചത്. ഈ ആരോപണത്തിന്‍‌മേല്‍ ഇപ്പോള്‍ അന്വേഷണം നടക്കുകയാണ്. അതിനു പിന്നാലെയാണ് ശില്‍പ്പയും രാജ് കുന്ദ്രയും രാജസ്ഥാന്‍ ടീമിന്‍റെ യഥാര്‍ത്ഥ ഉടമകളാണോ എന്ന കാര്യത്തില്‍ തനിക്ക് സംശയമുണ്ടെന്ന ശശാങ്ക് മനോഹറിന്‍റെ വെളിപ്പെടുത്തല്‍.

“ടീമുകളുടെ ഓഹരിയുടമകള്‍ ആരൊക്കെയാണെന്ന് ഈ ലോകത്തിന് മുഴുവന്‍ അറിയാമെന്നാണ് ലളിത് മോഡി ഒരു പ്രസ്താവന നടത്തിയത്. എന്നാല്‍ രാജസ്ഥാന്‍ റോയല്‍‌സിന്‍റെ ഉടമകളാരെന്ന് ഗവേര്‍ണിംഗ് കൌണ്‍സില്‍ അംഗങ്ങള്‍ക്കു പോലും അറിയില്ല. ശില്‍‌പ്പ ഷെട്ടിയുടെയും രാജ് കുന്ദ്രയുടെയും പേരുകള്‍ ഓഹരിയുടമകളുടെ പട്ടികയില്‍ എനിക്കു കാണാന്‍ കഴിഞ്ഞില്ല” - എന്നായിരുന്നു ശശാങ്ക് മനോഹര്‍ പറഞ്ഞത്.

I'm brand ambassador of RR only: Shilpa | ഞാന്‍ രാജസ്ഥാന്‍റെ അംബാസഡര്‍ മാത്രം: ശില്‍പ്പ

തൊണ്ണുറ്റിയൊമ്പതുകാരി യൂട്യൂബില്‍ സ്റ്റാര്‍

വയസ്സ് തൊണ്ണൂറ്റിയൊമ്പതായി... വയസ്സായെന്ന് കരുതി പുള്ളിക്കാരി അടങ്ങിയിരിക്കാനും തയ്യാറല്ല. പുസ്തകം വായിക്കണം, പാട്ടുകേള്‍ക്കണം, സിനിമ കാണണം... ഒന്നിനും ഒരു കുറവുമില്ല. എല്ലാറ്റിനും സാങ്കേതിക ലോകത്തെ ഏറ്റവും പുതിയ ഉല്‍പ്പന്നങ്ങളുടെ സേവനവും വേണം.

ലേക് ഓസ്‌വീഗോ സ്വദേശിയായ വിര്‍ജിനിയ കാം‌പെലാണ് തൊണ്ണൂറ്റിയൊമ്പതാം വയസ്സിലും ഇന്റര്‍നെറ്റും ആപ്പിളിന്റെ ഏറ്റവും പുതിയ ജനപ്രിയ ഉല്‍പ്പന്നമായ ഐപാഡും ഉപയോഗിക്കുന്നത്. നെറ്റില്‍ ലഭ്യമായ എല്ലാ സേവങ്ങള്‍ക്കും ഇവര്‍ ഉപയോഗിക്കുന്നത് ഐപാഡ് സേവനമാണ്. തൊണ്ണൂറ്റിയൊമ്പതുകാരി ഐപാഡ് ഉപയോഗിക്കുന്ന വീഡിയോയ്ക്ക് യൂട്യൂബില്‍ വന്‍ ഹിറ്റ്സാണ് ലഭിക്കുന്നത്.

ഐപാഡ് തന്റെ ജീവിതത്തെ ഏറെ മാറ്റിമറിച്ചെന്നും അവര്‍ പറഞ്ഞു. 1910ല്‍ ജനിച്ച ഇവര്‍ നേരത്തെ തന്നെ സാങ്കേതിക സേവനങ്ങള്‍ ഉപയോഗിക്കാറുണ്ടായിരുന്നെങ്കിലും അടുത്തിടെയാണ് സജീവമായത്. ഐപാഡ് ടാബ്‌ലറ്റ് ലഭിച്ചതോടെ മ്യൂസികും സിനിമയും പത്ര, പുസ്തക വായനയുമൊക്കെ നെറ്റിലൂടെയായി. ആപ്പിള്‍ മേധാവി സ്റ്റീവ് ജോബ്സിന്റെ പുതിയ കണ്ടുപിടിത്തത്തെ ഏറ്റവും വലിയ നേട്ടമായാണ് ഇവര്‍ കാണുന്നത്.

The 99-year-old tablet user and YouTube star | തൊണ്ണുറ്റിയൊമ്പതുകാരി യൂട്യൂബില്‍ സ്റ്റാര്‍