Monday, May 10, 2010

മോഹന്‍ലാലിന് വീണ്ടും ജൂഹി ചൌള നായിക


IFM
1998ല്‍ പുറത്തിറങ്ങിയ ‘ഹരികൃഷ്ണന്‍സ്’ എന്ന ചിത്രം ഓര്‍മ്മയില്ലേ? മലയാള പ്രേക്ഷകര്‍ക്ക് വിവാദങ്ങളുടെ പേരിലെങ്കിലും മറക്കാനാവാത്ത ചിത്രമാണ് അത്. ഫാസില്‍ സംവിധാനം ചെയ്ത ആ ചിത്രത്തില്‍ മമ്മൂട്ടിയും മോഹന്‍ലാലുമായിരുന്നു നായകന്‍‌മാര്‍. ഹിന്ദിയിലെ താരസുന്ദരി ജൂഹി ചൌളയായിരുന്നു നായിക. ഇരട്ട ക്ലൈമാക്സ് ആണ് ആ ചിത്രത്തെ വിവാദങ്ങളിലേക്ക് വലിച്ചിഴച്ചത്.

മോഹന്‍ലാലോ മമ്മൂട്ടിയോ, ആരാണ് നായികയെ സ്വന്തമാക്കേണ്ടത് എന്നതായിരുന്നു ഫാസിലിനെ കുഴപ്പിച്ച ചോദ്യം. ഒടുവില്‍ പകുതി പ്രിന്‍റുകളില്‍ ലാലിന് ജൂഹിയെ കിട്ടുന്നതായും ബാക്കി പകുതിയില്‍ ജൂഹിയെ മമ്മൂട്ടി നേടുന്നതായും ചിത്രീകരിച്ചു. ചിത്രം തിയേറ്ററുകളിലെത്തിയപ്പോള്‍ ഇരട്ട ക്ലൈമാസ് വന്‍ വിവാദമാണ് സൃഷ്ടിച്ചത്.

ഇപ്പോഴിതാ, ജൂഹി ചൌളയെ സ്വന്തമാക്കാന്‍ മോഹന്‍ലാലിന് വീണ്ടും ഒരു അവസരം. ഇത്തവണ മത്സരത്തിന് മമ്മൂട്ടി ഉണ്ടാകുകയുമില്ല. അതേ, ഷാജി എന്‍ കരുണ്‍ സംവിധാനം ചെയ്യുന്ന ‘ഗാഥ’ എന്ന ചിത്രത്തിലാണ് മോഹന്‍ലാലിന് ജൂഹി നായികയാകുന്നത്. ടി പത്മനാഭന്‍റെ ‘കടല്‍’ എന്ന ചെറുകഥയാണ് ഈ സിനിമയ്ക്ക് ആധാരം.

മോഹന്‍ലാലിന്‍റെ ഭാര്യയായാണ് ജൂഹി ഗാഥയില്‍ അഭിനയിക്കുന്നത്. ആദ്യം ജയാ ബച്ചനെയും പിന്നീട് മാധുരി ദീക്ഷിതിനെയും മോഹന്‍ലാലിന്‍റെ ഭാര്യാവേഷത്തിനായി ആലോചിച്ചതാണ്. ഒടുവിലാണ് സംവിധായകന്‍ ജൂഹിയിലെത്തിയത്. ഈ ചിത്രത്തില്‍ മോഹന്‍ലാലിന് ഒരു മകളും ഉണ്ട്.

Juhi in Malayalam | മോഹന്‍ലാലിന് വീണ്ടും ജൂഹി ചൌള നായിക

രൂപയുടെ മൂല്യത്തില്‍ 40 പൈസ നേട്ടം

യുഎസ് ഡോളറിനെതിരെ രൂപയുടെ മൂല്യത്തില്‍ വന്‍ നേട്ടം. തിങ്കളാഴ്ച നാല്പത് പൈസയുടെ മുന്നേറ്റമാണ് വിപണിയില്‍ രേഖപ്പെടുത്തിയിരിക്കുന്നത്. വിദേശ മൂലധന നിക്ഷേപത്തില്‍ നേട്ടമുണ്ടാകുമെന്ന പ്രതീക്ഷയാണ് രൂപയുടെ മൂല്യം ഉയരാനിടയാക്കിയത്.

ഫൊറെക്സ് വിപണിയില്‍ ആഭ്യന്തര കറന്‍സിയുടെ മൂല്യം ഡോളറിന് 45.08 രൂപയെന്ന നിലയിലാണ് ഇപ്പോള്‍ വ്യാപാരം നടക്കുന്നത്. കഴിഞ്ഞ ദിവസം ഡോളറിനെതിരെ 18 പൈസയുടെ ഇടിവോടെ 45.45/49 എന്ന നിലയിലായിരുന്നു വ്യാപാരം ക്ലോസ് ചെയ്തിരുന്നത്.

ഏഷ്യന്‍, യു എസ് വിപണികളിലെ തിരിച്ചുവരവും രൂപയ്ക്ക് നേട്ടമായിട്ടുണ്ട്. ആഭ്യന്തര വിപണിയില്‍ തുടക്ക വ്യാപാരത്തില്‍ തന്നെ മികച്ച മുന്നേറ്റമാണ് പ്രകടമായിരിക്കുന്നത്. ആഭ്യന്തര വിപണിയില്‍ സെന്‍സെക്സ്, നിഫ്റ്റി ഓഹരികള്‍ ആദ്യ അഞ്ചു മിനുറ്റില്‍ തന്നെ മികച്ച കുതിപ്പാണ് നടത്തിയത്

Rupee rises 40 paise against US dollar in early trade | രൂപയുടെ മൂല്യത്തില്‍ 40 പൈസ നേട്ടം

ടൊയോട്ടയുടെ ഹൈഡ്രജന്‍ വാഹനം 2015ല്‍

ടൊയോട്ടയുടെ ഹൈഡ്രജന്‍ വാഹനം 2015ല്‍ അമേരിക്കന്‍ വിപണിയിലെത്തിക്കുമെന്ന് കമ്പനി അധികൃതര്‍ അറിയിച്ചു. ചെലവ് കുറച്ച് പുറത്തിറക്കുന്ന ഹൈഡ്രജന്‍ വാഹനത്തിന് ഏകദേശം 50,000 അമേരിക്കന്‍ ഡോളര്‍ വിലവരുമെന്നാണ് പ്രതീക്ഷിക്കുന്നതെന്ന് ടൊയോട്ട വക്താവ് പറഞ്ഞു.

ഇലക്ട്രിക് വാഹന വിപണിയില്‍ വന്‍ പ്രതീക്ഷകളുമായാണ് ടൊയോട്ടയുടെ ഹൈഡ്രജന്‍ വാഹനമെത്തുന്നത്. നേരത്തെ ജനറല്‍ മോട്ടോര്‍സും ഇലക്ട്രിക് വാഹനം അമേരിക്കന്‍ വിപണിയിലെത്തിച്ചിരുന്നു. ഹൈഡ്രജന്‍ കാര്‍ പെട്രോള്‍ വാഹന മോഡലുകള്‍ക്ക് സമാനമായിരിക്കുമെന്ന് ടൊയോട്ട മാനേജിംഗ് ഡയറക്ടര്‍ യൊഷിഹികോ മസൂദ് വ്യക്തമാക്കി.

നിലവിലെ ഇലക്ട്രിക് കാറുകളില്‍ നിന്ന് ഏറെ വ്യത്യാസങ്ങളുമായാണ് പുതിയ ഹൈഡ്രജന്‍ വാഹനം വിപണിയിലെത്തിക്കുക. ഒരു ചാര്‍ജിങ്ങില്‍ ചുരുങ്ങിയത് 200 കിലോ മീറ്റര്‍ ഓടുമെന്നാണ് കമ്പനി അവകാശപ്പെടുന്നത്. ടൊയോട്ടയുടെ മുന്‍ ഇലക്ട്രിക് വാഹനങ്ങളില്‍ നിന്ന് വ്യത്യസ്തമായി ഏറെ ചെലവ് കുറച്ചാണ് ഹൈഡ്രജന്‍ കാര്‍ നിമ്മിക്കുന്നത്

അടുത്തിടെ ഹ്യുണ്ടേയ് മോട്ടോര്‍ ഇന്ത്യയുടെ പ്രഥമ ഇലക്ട്രിക് കാര്‍ ഐ ടെന്‍ ഇലക്ട്രിക് പുറത്തിറക്കിയിരുന്നു. മലിനീകരണം തെല്ലുമുണ്ടാക്കാത്ത കാര്‍ നഗരയാത്രകള്‍ക്കായി വികസിപ്പിച്ചെടുത്തതാണ്. 49 കിലോ വാട്ട് ഇലക്ട്രിക് മോട്ടോറാണ് കാറിനെ്‍റ ഹൃദയം. 16 കിലോവാട്ട് ലിതിയം അയണ്‍ പോളിമര്‍ ബാറ്ററിയാണ് ഉപയോഗിച്ചിരിക്കുന്നത്

Hydrogen vehicle on sale by 2015 | ടൊയോട്ടയുടെ ഹൈഡ്രജന്‍ വാഹനം 2015ല്‍

ബജാജ് ഡിസ്കവര്‍ 150സിസി വീണ്ടുമെത്തുന്നു


PRO
PRO
വാഹന നിര്‍മ്മാണ മേഖലയിലെ പ്രമുഖ കമ്പനിയായ ബജാജ് ഓട്ടോ ഡിസ്കവര്‍ 150 സി സി പതിപ്പുമായി വ്ണ്ടും ഇന്ത്യന്‍ വിപണിയിലെത്തുന്നു. ഇന്ധനക്ഷമത ഏറെ ലഭിക്കുമെന്ന ഡിസ്കവര്‍ 150 സി സി പള്‍സര്‍ 150നേക്കാളും മികച്ചതായിരിക്കുമെന്നാണ് കമ്പനി വൃത്തങ്ങള്‍ നല്‍കുന്ന സൂചന. പള്‍സര്‍ 135 എല്‍ എസിന്റെയും പള്‍സര്‍ 150ന്റെയും ഇടയില്‍ വരുന്ന ഡിസ്കവര്‍ 150 സി സി എഞ്ചിന് 14.1 പി എസ് ശക്തിയുണ്ടാകും.

ഇന്ത്യന്‍ വിപണിയില്‍ കൂടുതല്‍ ശ്രദ്ധ കേന്ദ്രീകരിക്കാന്‍ തീരുമാനിച്ച ബജാജ് ഓട്ടോ ഡിസ്കവര്‍ 150 സിസി ഉടന്‍ മാര്‍ക്കറ്റിലെത്തിക്കുമെന്ന് എം ഡി രാജീവ് ബജാജ് അറിയിച്ചു. ചെലവ് കുറഞ്ഞ ഇരുചക്ര വാഹനങ്ങള്‍ക്ക് ഇന്ത്യന്‍ വിപണിയില്‍ ഏറെ ജനപ്രീതി ലഭിക്കുന്നുണ്ട്. ബജാജ് പള്‍സര്‍ 150 ഡി ടി എസ് ഐക്കാളും വിലകുറവില്‍ ലഭിക്കുന്നതായിരിക്കും പുതിയ ഡിസ്കവര്‍ 150 സി സിയെന്നും അദ്ദേഹം വ്യക്തമാക്കി.

ബജാജ് 100 സിസി ബൈക്കുകളില്‍ നിന്ന്‌ എന്‍ജിന്‍ ശേഷിയേറിയ മോഡലുകളിലേക്കു മുന്നേറാന്‍ തയ്യാറായത് രണ്ടു വര്‍ഷം മുമ്പായിരുന്നു. പിന്നാലെ 100 സിസിയുടെ ഇന്ധനക്ഷമതയും 125 സിസിയുടെ പ്രകടനവും വാഗ്ദാനം ചെയ്‌ത്‌ എക്സീഡ്‌ ഡിടിഎസ്‌-എസ്‌ഐ പോലുള്ള മോഡലുകളും കമ്പനി അവതരിപ്പിച്ചു.

Bajaj Discover 150cc in India | ബജാജ് ഡിസ്കവര്‍ 150സിസി വീണ്ടുമെത്തുന്നു

വലിയ സംവിധായകര്‍ എന്നെ നായകനാക്കുന്നില്ല: മണി


PRO
കലാഭവന്‍ മണിക്ക് നേരിയ പരിഭവമുണ്ട്. വലിയ സംവിധായകര്‍ ആരും തന്നെ നായകനാക്കി സിനിമ ആലോചിക്കുന്നില്ല എന്നാണ് മണിയുടെ പരിഭവം. ഒരു പ്രമുഖ ചലച്ചിത്രവാരികയ്ക്ക് അനുവദിച്ച അഭിമുഖത്തിലാണ് മണി ഇക്കാര്യം പറയുന്നത്.

“ഞാന്‍ അടുത്തിടെ നായകനായി അഭിനയിച്ച മിക്ക ചിത്രങ്ങളുടെയും സംവിധായകര്‍ പുതുമുഖങ്ങളാണ്. എന്നാല്‍ ആ ചിത്രങ്ങളൊക്കെ വിജയം കണ്ടോ എന്നത് മറ്റൊരു കാര്യം. ഇന്നത്തെ വലിയ സംവിധായകര്‍ ആരും എന്നെ നായകനാക്കി സിനിമ ചെയ്യാന്‍ വരാറില്ല. അങ്ങനെ ചെയ്തിരുന്നെങ്കില്‍ എന്‍റെ സിനിമയും നന്നായി ഓടുമായിരുന്നു. എന്നെ നായകനാക്കി സിനിമ ചെയ്യാനുള്ള പേടികൊണ്ടാണോ അതോ എന്നെ നായകനാക്കാനുള്ള കഥ കിട്ടാത്തതുകൊണ്ടാണോ അവര്‍ സമീപിക്കാതിരിക്കുന്നത് എന്ന് എനിക്കറിയില്ല” - മണി പറയുന്നു.

“എന്‍റെ വളരെ നല്ല ചിത്രങ്ങള്‍ പോലും പ്രേക്ഷകര്‍ സ്വീകരിക്കാത്ത സ്ഥിതി വന്നിട്ടുണ്ട്. പുതുമയാര്‍ന്ന പ്രമേയവുമായി എന്നെ നായകനാക്കി ചിത്രമെടുക്കാന്‍ ധൈര്യത്തോടെ ഒരു കഴിവുറ്റ സംവിധായകന്‍ വന്നാല്‍ മാത്രമേ ഈ അവസ്ഥയില്‍ നിന്ന് എനിക്ക് രക്ഷപ്പെടാന്‍ കഴിയൂ. പക്ഷേ, അങ്ങനെ ആരും എന്നെ സമീപിക്കുന്നില്ല” - മണി പരിഭവിക്കുന്നു.

“പല താരങ്ങളും വേണ്ട എന്നു പറഞ്ഞ് തഴയുന്ന സബ്ജക്ടുകളാണ് ഒടുവില്‍ എന്നെത്തേടി വരുന്നത്. അവയില്‍ ചില മാറ്റങ്ങള്‍ വരുത്തി നന്നാക്കിയാണ് ഞാന്‍ അഭിനയിക്കുന്നത്.” - മണി വ്യക്തമാക്കി.

താന്‍ എല്ലാവരെയും സഹായിക്കാറുണ്ടെന്നും സഹായം ആവശ്യപ്പെട്ടുകൊണ്ടുള്ള ഫോണ്‍‌വിളികള്‍ കാരണം ബുദ്ധിമുട്ടിലായിരിക്കുകയാണെന്നും കലാഭവന്‍ മണി വെളിപ്പെടുത്തുന്നു.

“ചാലക്കുടിയില്‍ മാത്രമല്ല, എല്ലാവരെയും ഞാന്‍ സഹായിക്കാറുണ്ട്. സഹായം ആവശ്യപ്പെട്ടുകൊണ്ടുള്ള ഫോണ്‍‌വിളികള്‍ കാരണം എനിക്കിപ്പോള്‍ ഇരിക്കപ്പൊറുതിയില്ലാത്ത അവസ്ഥയാണ്. സഹിക്കാനാകാതെ ഞാന്‍ ഫോണ്‍ ഓഫ് ചെയ്ത് വച്ചിരിക്കുകയാണ്. ഞാന്‍ വീട്ടിലുള്ളപ്പോള്‍ വീടിനുമുമ്പില്‍ നിറയെ ആള്‍ക്കാരായിരിക്കും. പലപ്പോഴും അവരെ പിരിച്ചുവിടാന്‍ തന്നെ ഞാന്‍ ബുദ്ധിമുട്ടിയിട്ടുണ്ട്. എനിക്ക് സിനിമയില്‍ നിന്ന് ലഭിക്കുന്നതിന്‍റെ ഭൂരിഭാഗവും ഞാന്‍ പാവങ്ങള്‍ക്ക് കൊടുക്കുകയാണ്.” - താന്‍ ജനപ്രിയനാകുന്നതില്‍ ചാലക്കുടിയിലെ രാഷ്ട്രീയക്കാര്‍ക്കുള്ള മുറുമുറുപ്പൊന്നും ശ്രദ്ധിക്കാറില്ലെന്നും കലാഭവന്‍ മണി പറയുന്നു

ലാദന്‍ എവിടെ? പാകിസ്ഥാനറിയാമെന്ന് യു എസ്

അല്‍‌ക്വൊയ്ദ തലവന്‍ ഒസാമ ബിന്‍ ലാദന്‍ എവിടെയാണെന്ന് പാകിസ്ഥാന്‍ ഭരണകൂടത്തിന് അറിയാമെന്ന് അമേരിക്ക. പാക് ഭരണകൂടത്തിലെ ചില ഉദ്യോഗസ്ഥര്‍ക്ക് ലാദനും മുല്ല ഒമറും എവിടെയുണ്ടെന്ന് അറിയാമെന്നാണ് അമേരിക്കയുടെ വിദേശകാര്യ സെക്രട്ടറി ഹിലരി ക്ലിന്‍റന്‍ തുറന്നടിച്ചത്.

ലാദനെ നിയമത്തിനു മുന്നില്‍ എത്തിക്കാനാവശ്യമായ സഹായങ്ങള്‍ പാകിസ്ഥാന്‍ നല്‍കുമെന്ന പ്രതീക്ഷയാണ് അമേരിക്കയ്ക്കുള്ളതെന്നും ഹിലരി പറഞ്ഞു. ഭീകരതയ്ക്കെതിരായ പോരാട്ടത്തില്‍ പാകിസ്ഥാന്‍ ഇപ്പോള്‍ തന്നെ സഹകരിക്കുന്നുണ്ട്. എന്നാല്‍ ഇതില്‍ക്കൂടുതല്‍ പാകിസ്ഥാനില്‍ നിന്ന് പ്രതീക്ഷിക്കുന്നു - ഹിലരി വ്യക്തമാക്കി.

“പാക് ഭരണകൂടത്തിലെ ഉന്നതര്‍ക്ക് ലാദനെക്കുറിച്ചോ ഒമറിനെക്കുറിച്ചോ കൂടുതല്‍ അറിയാമെന്നല്ല പറയുന്നത്. പക്ഷേ, ചില ഉദ്യോഗസ്ഥര്‍ക്ക് അറിയാം എന്നത് വ്യക്തമാണ്. 9/11 ആക്രമണത്തിലെ കുറ്റക്കാരെ ശിക്ഷിക്കുന്നതിന് പാകിസ്ഥാനില്‍ നിന്ന് കൂടുതല്‍ സഹകരണം പ്രതീക്ഷിക്കുന്നു.” - ഹിലരി പറഞ്ഞു.

ടൈംസ്‌ സ്ക്വയറില്‍ ബോംബ് സ്ഥാപിച്ചതുമായി ബന്ധപ്പെട്ട് പാകിസ്ഥാനെതിരെ അമേരിക്ക ആരോപണം ഉന്നയിച്ചിരുന്നു. പാകിസ്ഥാന്‍ സ്വദേശിയായ ഒരു അമേരിക്കന്‍ പൌരനെ ഇതുമായി ബന്ധപ്പെട്ട് അറസ്റ്റ് ചെയ്തിരുന്നു.

അമേരിക്കയുടെ ഇപ്പോഴത്തെ പരാമര്‍ശങ്ങളും നീക്കങ്ങളും പാകിസ്ഥാനെ കൂടുതല്‍ സമ്മര്‍ദ്ദത്തിലാക്കിയിരിക്കുകയാണെന്ന് റിപ്പോര്‍ട്ടുകള്‍ പറയുന്നു

'Pak officials know more about Osama' | ലാദന്‍ എവിടെ? പാകിസ്ഥാനറിയാമെന്ന് യു എസ്

കിനാലൂരില്‍ നാലുവരിപ്പാത വേണ്ടെന്ന് വികെസി ഗ്രൂപ്പ്


PRO
വ്യവസായ ആവശ്യത്തിനായി നാലുവരിപ്പാത വേണമെന്ന് തങ്ങള്‍ ആവശ്യപ്പെട്ടിട്ടില്ലെന്ന് കിനാലൂരില്‍ നിര്‍മ്മിക്കാന്‍ പോകുന്ന ഫുട് വെയര്‍ പാര്‍ക്കിലെ പ്രധാന സംരംഭകരിലൊരാളായ വി കെ സി ഗ്രൂപ്പ് പറഞ്ഞു. ഒരു സ്വകാര്യ വാര്‍ത്താ ചാനലിന് നല്കിയ അഭിമുഖത്തില്‍ വി കെ സി ഗ്രൂപ്പ് ചെയര്‍മാന്‍ വി കെ സി മമ്മദ് കോയയാണ് ഇക്കാര്യം വെളിപ്പെടുത്തിയത്.

കിനാലൂരിലെ ഫുട് വെയര്‍ പാര്‍ക്കിന് നാലുവരിപ്പാതയുടെ ആവശ്യമില്ല. ഫുട് വെയര്‍ പാര്‍ക്കില്‍ പങ്കാളികളായ 38 കമ്പനികളില്‍ ഒരു കമ്പനി പോലും ഈ ആവശ്യം മുന്നോട്ടു വെച്ചിട്ടില്ല. നിലവിലെ റോഡ് വെച്ച് തന്നെ ഫുട് വെയര്‍ പാര്‍ക്ക് തുടങ്ങാവുന്നതാണ്. പദ്ധതിക്ക് അവിടെ തന്നെ സ്ഥലം വേണമെന്നില്ല. ഇവിടെ സ്ഥലം ലഭിച്ചില്ലെങ്കില്‍ വേറെ എവിടെയെങ്കിലും കമ്പനി തുടങ്ങാവുന്നതാണ്.

കഴിഞ്ഞമാസം 22നായിരുന്നു ഫുട് വെയര്‍ പാര്‍ക്കിന് വ്യവസായമന്ത്രി എളമരം കരീം കിനാലൂരില്‍ തറക്കല്ലിട്ടത്. ഫുട് വെയര്‍ പാര്‍ക്ക് ആരംഭിക്കാന്‍ 38 കമ്പനികള്‍ക്കായിരുന്നു അനുമതി നല്കിയത്. എന്നാല്‍ ഈ കമ്പനികളൊന്നും നാലുവരിപ്പാത ആവശ്യമാണെന്ന് പറഞ്ഞിട്ടില്ലെന്നാണ് പുതിയ വെളിപ്പെടുത്തലുകളിലൂടെ പുറത്തുവരുന്നത്.

ഫുട് വെയര്‍ പാര്‍ക്കിനു വേണ്ടിയാണ് നാലുവരിപ്പാത വരുന്നതെന്നായിരുന്നു വ്യവസായമന്ത്രി എളമരം കരീം പറഞ്ഞു. ഇതോടെ കിനാലൂരിലെ നാലുവരിപ്പാത ഭൂമാഫിയയെ സഹായിക്കാനാണെന്ന ആരോപണങ്ങള്‍ക്ക് ശക്തിയേറുകയാണ്

No need four line road in Kinaloor: VKC group | കിനാലൂരില്‍ നാലുവരിപ്പാത വേണ്ടെന്ന് വികെസി ഗ്രൂപ്പ്

ചേന്ദമംഗലത്തെ ജൂത സിനഗോഗ്


PROPRO
വിനോദസഞ്ചാര ആകര്‍ഷണങ്ങളായ കേരളത്തിലെ ചരിത്ര സമാരകങ്ങളുടെ കൂട്ടത്തില്‍ ഏറെയൊന്നും ചര്‍ച്ച ചെയ്യപ്പെടാത്ത പോകുന്ന കേന്ദ്രമാണ് എറണാകുളം ജില്ലയിലെ ചേന്ദമംഗലത്തുള്ള ജൂത സിനഗോഗ്. മട്ടാഞ്ചേരിയിലെ ജൂത സംസ്കാര പ്രതീകങ്ങള്‍ ടൂറിസം മേഖലയില്‍ സജീവ പരിഗണന നേടുമ്പോഴും ചേന്ദമംഗലം സിനഗോഗ് പലപ്പോഴും വിസ്‌മൃതിയിലാകുകയാണ് പതിവ്. 

വേണ്ടത്ര ശ്രദ്ധ ലഭിച്ചിട്ടില്ലെങ്കിലും ഇതിന്‍റെ ചരിത്ര പ്രാധാന്യവും വാസ്തുശില്‍പ്പ തനിമയുമൊക്കെ തിരിച്ചറിഞ്ഞ് നിരവധി സഞ്ചാരികള്‍ ഇവിടേയ്ക്ക് എത്താറുണ്ട്. മലയാളികളും ജൂതരും തമ്മിലുള്ള സാംസ്കാരിക ബന്ധത്തിന്‍റെ ആഴം വ്യക്തമാക്കുന്നതാണ് ഇതിന്‍റെ നിര്‍മ്മിതി.

കേരളത്തിന്‍റെ വാസ്തുവിദ്യയും യൂറോപ്യന്‍ സാങ്കേതിക വിദ്യയും സമന്വയിപ്പിച്ച് നിര്‍മ്മിച്ചിരിക്കുന്ന ഈ സിനഗോഗിന് 175ലേറെ വര്‍ഷം പഴക്കം വരും, കേരള പുരാവസ്തു വകുപ്പാണ് ഇതിന്‍റെ സംരക്ഷണവും പരിപാലനവും നിര്‍വഹിക്കുന്നത്.

പുറമേ നിന്ന് നോക്കിയാല്‍ കേരള മാതൃകയിലുള്ള ഒരു പള്ളി എന്ന് മാത്രം തോനിക്കുന്ന ഈ സിനഗോഗിന്‍റെ ഉള്‍ഭാഗം എന്നാല്‍ ഏതോരു ജൂത ദേവാലയത്തിനോടും കിടപിടിക്കുന്നതാണ്. ഗംഭീരമായ അള്‍ത്താര, ഉള്ളില്‍ നിന്ന് ചില്ല് പാകിയ മേല്‍ക്കൂര തുടങ്ങിയവ ഇതിന്‍റെ മാറ്റ് കൂട്ടുന്നു. 
http://malayalam.webdunia.com/entertainment/tourism/keralam/0810/01/1081001114_1.htm

പഞ്ചാബ് മോഡല്‍ പ്രസംഗം ശരിയായിരുന്നെന്ന് പിള്ള


PRO
തന്‍റെ മന്ത്രിസ്ഥാനം നഷ്ടമാക്കിയ പഞ്ചാബ് മോഡല്‍ പ്രസംഗം ശരിയായിരുന്നുവെന്ന് കേരള കോണ്‍ഗ്രസ് (ബി) നേതാവ് ആര്‍ ബാലകൃഷ്ണ പിള്ള. കൊച്ചിയില്‍ കേരള കോണ്‍ഗ്രസ് (ബി) സംസ്ഥാന സമിതി യോഗത്തില്‍ സംസാരിക്കുകയായിരുന്നു അദ്ദേഹം.

1986ലെ പഞ്ചാബ് മോഡല്‍ പ്രസംഗത്തെ തള്ളിപ്പറയില്ല. വികസനത്തിനുവേണ്ടിയുള്ള ആ മുദ്രാവാക്യം അന്ന്‌ ഉയര്‍ത്തിപ്പിടിച്ചിരുന്നെങ്കില്‍ കേരളാ കോണ്‍ഗ്രസ്‌ കേരളം ഭരിച്ചേനേയെന്നും പിള്ള പറഞ്ഞു. പല സംസ്ഥാനങ്ങളിലും ഘടകകക്ഷികള്‍ വലിയ കക്ഷികളായി മാറിയിട്ടുണ്ട്. കേരള കോണ്‍ഗ്രസ് അന്ന് തന്‍റെ നിലപാടിനെ അനുകൂലിച്ചിരുന്നെങ്കില്‍ ഇന്ന് വലിയ കക്ഷിയാകാന്‍ കഴിഞ്ഞേനെ.

അന്ന് മുഖ്യമന്ത്രിയായിരുന്ന കെ കരുണാകരനും മന്ത്രിയായിരുന്ന കെ എം മാണിയും തന്‍റെ നിലപാടിനെ എതിര്‍ത്തു. കോച്ച് ഫാക്ടറിക്കായി പഞ്ചാബില്‍ സ്വീകരിച്ച നിലപാട്‌ ഇവിടെയും സ്വീകരിക്കേണ്ടി വരുമെന്നാണ്‌ താന്‍ പറഞ്ഞത്‌. വികസനത്തിനുവേണ്ടിയുള്ള ആ മുദ്രാവാക്യത്തില്‍ ഉറച്ചുനിന്നിരുന്നുവെങ്കില്‍ കേരളാ കോണ്‍ഗ്രസ്‌ അടുത്ത തെരഞ്ഞെടുപ്പില്‍ ഭരണത്തില്‍ ഏറുകയോ ഒരു മുഖ്യമന്ത്രിയെ വരെ ലഭിക്കുയോ ചെയ്തേനെ.

കേരളാ കോണ്‍ഗ്രസ്‌ മാണി-ജോസഫ്‌ ലയനം യുഡിഫില്‍ ചര്‍ച്ച ചെയ്തശേഷമേ പാടുള്ളൂ എന്ന നിലപാടില്‍ ഉറച്ചുനില്‍ക്കുന്നു. എന്നാല്‍ ഇപ്പോഴത്തെ സാഹചര്യത്തില്‍ കേരള കോണ്‍ഗ്രസ് ലയിച്ചാല്‍ അത് ശരിയായ ലയനമാകില്ല. യു ഡി എഫ്‌ രൂപംകൊണ്ട കാലംമുതലുള്ള കെ എം മാണി മുന്നണിയില്‍ ഉണ്ടാകണം. മാണി യു ഡി എഫ് വിട്ടു പോകരുത്. എന്നാല്‍ പി ജെ ജോസഫിനെ മുന്നണിയില്‍ എടുക്കാന്‍ കഴിയില്ല. നാറുന്നവരെ ചുമന്നാല്‍ ചുമക്കുന്നവനും നാറുമെന്നും ബാലകൃഷ്ണ പിള്ള പറഞ്ഞു.

രാജീവ് ഗാന്ധി പ്രധാനമന്ത്രിയായിരുന്ന 1986ല്‍ കേന്ദ്രസര്‍ക്കാര്‍ സംസ്ഥാനത്തൊട് കാട്ടുന്ന അവഗണനയ്ക്കെതിരെ ആയിരുന്നു പിള്ളയുടെ പ്രസംഗം. അവഗണന തുടര്‍ന്നാല്‍ കേരളവും പഞ്ചാബ്‌ മോഡല്‍ സമരത്തിന്‌ തയ്യാറാവേണ്ടി വരുമെന്നായിരുന്നു പ്രസംഗത്തിന്റെ ചുരുക്കം. ഭരണഘടനാപരമായി സത്യപ്രതിജ്ഞ ചെയ്‌ത ഒരു മന്ത്രി വിഘടനവാദ സമരത്തിന്‌ ആഹ്വാനം ചെയ്യുന്നതിലെ ഗൗരവം ചോദ്യം ചെയ്യപ്പെട്ടതോടെ പിള്ളയ്ക്ക് മന്ത്രിസഭയില്‍ നിന്ന് രാജിവെയ്ക്കേണ്ടി വന്നു

No regret in Punchab model speech: Balakrishna Pillai | പഞ്ചാബ് മോഡല്‍ പ്രസംഗം ശരിയായിരുന്നെന്ന് പിള്ള

ഗ്രീസിന് 40 ബില്യന്‍ ഡോളര്‍ സഹായം

ഗ്രീസിന് 40 ബില്യന്‍ അമേരിക്കന്‍ ഡോളര്‍ വായ്പ അനുവദിക്കുന്നതിന് അന്താരാഷ്ട്ര നാണയ നിധി (ഐ എം എഫ്) അനുമതി നല്‍കി. കടുത്ത സാമ്പത്തിക പ്രതിസന്ധിയിലായ ഗ്രീസിനെ സഹായിക്കുന്നതിന്റെ ഭാഗമായാണ് വായ്പ നല്‍കിയിരിക്കുന്നത്. യൂറോ യൂണിയനും ഐഎംഎഫും കൂടി പ്രഖ്യാപിച്ച സഹായ പദ്ധതിയുടെ ആദ്യ ഘട്ടമായാണ് ഐ എം എഫ് വായ്പ നല്‍കുന്നത്.

യൂറോപ്യന്‍ മേഖലയിലെ സാമ്പത്തിക സ്ഥിരത തിരിച്ചുക്കൊണ്ടുവരാനും ആഗോള സാമ്പത്തിക പ്രതിസന്ധിയില്‍ നിന്ന് ഗ്രീസിനെ കരകയറ്റുന്നതിനുമാണ് വായ്പയെന്ന് ഐ എം എഫ് മാനേജിങ് ഡയറക്ടര്‍ ഡൊമിനിക് ഖാന്‍ അറിയിച്ചു. 900 കോടി യൂറോയുടെ ബോണ്ടിന്റെ തിരിച്ചടവിനായി ഗ്രീസിന് മെയ് 19ന് മുമ്പ് പണം അത്യാവശ്യമാണ്. ഇത് മുടങ്ങിയാല്‍ യൂറോയുടെ വില കുത്തനെ ഇടിയുമെന്നാണ് സാമ്പത്തിക വിദഗ്ദ്ധര്‍ നല്‍കുന്ന സൂചന.

ഗ്രീസ് സര്‍ക്കാറിന്റെ അമിതമായ ധനക്കമ്മിയും അതുണ്ടാക്കിയ വന്‍ കടബാധ്യതയുമാണ് പ്രതിസന്ധിയുടെ അടിസ്ഥാന കാരണം. ഗ്രീസിന്റെ ധനക്കമ്മി ഇപ്പോള്‍ മൊത്തം ആഭ്യന്തര ഉത്പാദനത്തിന്റെ 12.7 ശതമാനമാണ്. മൊത്തം കടബാധ്യതയാകട്ടെ ജിഡിപിയുടെ 113 ശതമാനം വരും.

ഗ്രീസിലെ പൊതു ചെലവിലുണ്ടായ വര്‍ധന ധനക്കമ്മിയെയും കടബാധ്യതയെയും വഷളാക്കി. എങ്കിലും ഇത് പ്രതിസന്ധി നിലവാരത്തിലേക്ക് എത്തിയിരുന്നില്ല. പെട്ടെന്നാണ് 2008 അവസാനത്തോടെ ആഗോള ധനകാര്യ പ്രതിസന്ധിയും രൂക്ഷമായ മാന്ദ്യവുമുണ്ടായത്. യൂറോ എന്ന പൊതു കറന്‍സിയുള്ള യൂറോ പ്രദേശത്തില്‍പ്പെടുന്ന രാജ്യമാണ് ഗ്രീസ്. ഈ പൊതുകറന്‍സി പ്രശ്‌നം യൂറോപ്യന്‍ സാമ്പത്തിക മേഖലയില്‍ കൂടുതല്‍ പ്രതിസന്ധികള്‍ക്ക് കാരണമായേക്കുമെന്നാണ് കരുതുന്നത്

IMF board approves nearly $40 billion Greece loan | ഗ്രീസിന് 40 ബില്യന്‍ ഡോളര്‍ സഹായം

സെന്‍സെക്സില്‍ 580 പോയിന്റ് നേട്ടം

കഴിഞ്ഞ ആഴ്ചയിലെ തകര്‍ച്ചയ്ക്ക് ശേഷം തിങ്കളാഴ്ച ആഭ്യന്തര വിപണികളില്‍ വന്‍ മുന്നേറ്റം പ്രകടമായി. മുംബൈ ഓഹരി സൂചികയായ സെന്‍സെക്സ് 580 പോയിന്റ് മുന്നേറ്റം നടത്തി 17,349 എന്ന നിലയിലാണ് വ്യാപാരം നിര്‍ത്തിയത്. യു എസ്, ഏഷ്യന്‍ വിപണികളിലെ മുന്നേറ്റമാണ് ആഭ്യന്തര വിപണികളിലും പ്രകടമായിരിക്കുന്നത്.

സെന്‍സെക്സിലെ മുന്നേറ്റത്തിന് സമാനമായ നേട്ടം ദേശീയ ഓഹരി സൂചികയായ നിഫ്റ്റിയിലും പ്രകടമായി. നിഫ്റ്റി 184 പോയിന്റ് ഉയര്‍ന്ന് 5,202 എന്ന നിലയിലാണ് വ്യാപാരം നിര്‍ത്തിയത്. ഗ്രീസിനെ സഹായിക്കാനായി ഐ എം എഫ് രംഗത്ത് വന്നതോടെ ആഗോള വിപണികളെല്ലാം മികച്ച മുന്നേറ്റം നടത്തുകയായിരുന്നു.

മെറ്റല്‍, റിയാലിറ്റി, ബാങ്ക് മേഖലകളിലെ ഓഹരികളാണ് മികച്ച നേട്ടം കൈവരിച്ചത്. ഹിന്‍ഡാല്‍കോ ഇന്‍ഡസ്ട്രീസ് (5.86%), ജിന്‍ഡല്‍ സ്റ്റീല്‍(5.71%), കൊഡാക് ബാങ്ക്(5.30%), ടാറ്റാ സ്റ്റീല്‍(5.20%), റിലയന്‍സ് ഇന്‍ഫ്രാ(5.09%) ടാറ്റാ മോട്ടോര്‍സ്(6.81%) ഓഹരികളാണ് ഇന്ന് മികച്ച നേട്ടം കൈവരിച്ചത്. അതേസമയം, സിപ്ല, ഹീറോഹോണ്ട ഓഹരികള്‍ നേരിയ ഇടിവ് നേരിട്ടു

Sensex ends up 580pts | സെന്‍സെക്സില്‍ 580 പോയിന്റ് നേട്ടം

രമേശ് നിയന്ത്രണം പാലിക്കണമെന്ന് സിംഗ്


PTI
കേന്ദ്ര പരിസ്ഥിതി മന്ത്രി ജയ്‌റാം രമേശ് ആഭ്യന്തര മന്ത്രാലയത്തിന്റെ ചൈന നയത്തെ വിമര്‍ശിച്ചതിനെതിരെ പ്രധാനമന്ത്രി മന്‍‌മോഹന്‍ സിംഗ് പ്രതികരിച്ചു. രമേശ് മറ്റ് മന്ത്രാലയങ്ങളെ കുറിച്ച് അഭിപ്രായപ്രകടനം നടത്തുമ്പോള്‍ പരമാവധി സംയമനം പാലിക്കണമെന്ന് പ്രധാനമന്ത്രി പറഞ്ഞതായാണ് റിപ്പോര്‍ട്ടുകള്‍.

ചൈനെ നയത്തില്‍ സര്‍ക്കാരിന് ആശയക്കുഴപ്പമൊന്നുമില്ല. സൃഷ്ടിപരമായ ഇടപെടലാണ് ഇന്ത്യ ആഗ്രഹിക്കുന്നത്. ചൈനയെ പോലെയുള്ള പ്രധാനപ്പെട്ട അയല്‍ രാജ്യങ്ങളെ കുറിച്ചും മറ്റ് മന്ത്രാലയങ്ങളെ കുറിച്ചും അനാവശ്യ അഭിപ്രായപ്രകടനം നടത്താതിരിക്കാന്‍ മന്ത്രിമാര്‍ ശ്രദ്ധിക്കണമെന്നും സിംഗ് പറഞ്ഞതായാണ് പ്രധാനമന്ത്രിയുടെ ഓഫീസ് വൃത്തങ്ങള്‍ വെളിപ്പെടുത്തുന്നത്.

ബീജിംഗില്‍ വച്ചാണ് രമേഷ് വിവാദമായ അഭിപ്രായ പ്രകടനം നടത്തിയത്. ചൈനീസ് കമ്പനികള്‍ രാജ്യത്തേക്ക് വരുന്നതിനെതിരെ ആഭ്യന്തര മന്ത്രാലയം അനാവശ്യമായി പ്രതിരോധമുയര്‍ത്തുകയാണെന്നും കമ്പനികളുടെ വരവിനെ ഭയപ്പാടോടെയാണ് വീക്ഷിക്കുന്നതെന്നും രമേശ് അഭിപ്രായപ്പെട്ടിരുന്നു. ആഭ്യന്തര മന്ത്രാലയം ചൈനീസ് കമ്പനികള്‍ക്ക് നേരെ കൂടുതല്‍ അയഞ്ഞ സമീപനം നടത്തണമെന്നും കേന്ദ്ര പരിസ്ഥിതി മന്ത്രി ആവശ്യപ്പെട്ടിരുന്നു.

എന്നാല്‍, ചൈന കമ്പനികളെ ഭയപ്പാടോടെയാണ് കാണുന്നത് എന്ന രമേശിന്റെ പ്രസ്താവന ആഭ്യന്തരമന്ത്രാലയം തള്ളിക്കളഞ്ഞു. ടെലകോം മേഖല ഉള്‍പ്പെടെ എല്ലായിടത്തും ചൈനീസ് കമ്പനികള്‍ക്ക് ആവശ്യമായ പ്രാതിനിധ്യം നല്‍കുന്നുണ്ട് എന്ന് ആഭ്യന്തര സെക്രട്ടറി ജികെ പിള്ള ചൂണ്ടിക്കാട്ടി. ചൈനീസ് ടെലികോം കമ്പനിയായ ഹുവാവിയെ സുരക്ഷാ കാരണങ്ങളാല്‍ ഇന്ത്യ നിരോധിച്ചതിനു പിന്നാലെയാണ് രമേശിന്റെ പ്രസ്താവന വന്നിരിക്കുന്നത് എന്നത് ശ്രദ്ധേയമാണ്

Exercise max restraint, Singh to Ramesh | രമേശ് നിയന്ത്രണം പാലിക്കണമെന്ന് സിംഗ്

അമ്മ: ഉറങ്ങാതെ കൂട്ടിരിക്കുന്ന സ്നേഹം


PRO
അമ്മ എന്തെന്ന് പറഞ്ഞു തരുന്ന ഒരു ‘ഇന്‍റര്‍നെറ്റ്’ കുറിപ്പ്. കഴിഞ്ഞ വര്‍ഷത്തെ പോസ്റ്റ് ആണെങ്കിലും ആധുനിക ലോകത്തിന് അമ്മയെ മനസ്സിലാക്കാന്‍ ഇത് ധാ‍രാളം. കൂട്ടുകാരന്‍റെ സങ്കടമായിരുന്നു ഈ കുറിപ്പില്‍ ‘നെറ്റിസണ്‍’ പങ്കുവെച്ചത്. കൂട്ടുകാരന്‍റെ ഭാര്യ ഒരാഴ്ചയായി ഉറങ്ങാന്‍ പോകുന്നത് രാവിലെ അഞ്ചു മണിക്ക്. ദിവസം ഒന്നോ രണ്ടോ മണിക്കൂര്‍ മാത്രം ഉറങ്ങുന്നു.

നാലു മാസം പ്രായമുള്ള രണ്ടാമത്തെ കുഞ്ഞ് നിറുത്താതെ കരച്ചിലാണെപ്പോഴും. ജോലിക്ക് പോകേണ്ടതിനാല്‍ കൂട്ടുകാരന് ഉറങ്ങാതിരിക്കാന്‍ വയ്യ. ഭാര്യയുടെ അനുഭവം കണ്ട് കണ്ണുനിറഞ്ഞ കൂട്ടുകാരന്‍ സഹപ്രവര്‍ത്തകനോട് പറഞ്ഞു, ‘നമ്മള്‍ ചെറുതായിരുന്നപ്പോള്‍ നമ്മുടെ അമ്മയും ഇതുപോലെ ഒരുപാട് കഷ്ടപ്പെട്ടിട്ടുണ്ടാകും, അല്ലേ?’. അതെ, ഇല്ലെങ്കില്‍ നമ്മളൊക്കെ ഇങ്ങനെയിരിക്കുമോ?

അമ്മയെന്ന സങ്കല്പത്തെ സ്വര്‍ണ നൂലുകൊണ്ട് തൊട്ടിലുണ്ടാക്കി താരാട്ടു പാടിയുറക്കുന്ന ഒരു കഥാകൃത്തുണ്ട് നമ്മള്‍ക്ക്. അമ്മയെ കണ്ട ഓര്‍മ്മയില്ല, എന്നെ പ്രസവിച്ച് രണ്ടു ദിവസം കഴിഞ്ഞപ്പോള്‍ അമ്മ മരിച്ചു. അമ്മ എന്തെന്ന് അറിഞ്ഞത് ബാപ്പയുടെ അമ്മ തന്ന വാല്സല്യത്തില്‍ നിന്നാണ്. പിന്നെ ബാലാമണി അമ്മയുടെ കവിതകളിലൂടെ, വൈലോപ്പിള്ളിയുടെ മാമ്പഴത്തിലൂടെ. അമ്മയെക്കുറിച്ച് ആരുപറയുമ്പോഴും അതീവ താല്പര്യത്തോടെ കേള്‍ക്കാറുണ്ട് - മലയാളത്തിന്‍റെ പ്രിയ കഥാകാരന്‍ യു എ ഖാദറിന്‍റേതാണ് ഈ അമ്മ സങ്കല്പങ്ങള്‍. ഓര്‍മ്മകളില്‍ പോലും ഇല്ലാത്ത അമ്മയെ സങ്കല്പങ്ങളുടെ സ്വര്‍ഗലോകത്ത് കൂടെ കൂട്ടുകയാണ് ഈ കഥാകാരന്‍.

‘അമ്മ’ എന്ന നന്മ എത്ര ലഭിച്ചാലും നമുക്ക് മതിയാകില്ല. ലഭിക്കുമ്പോള്‍ ആര്‍ഭാടത്തോടെ ആസ്വദിച്ചു തീര്‍ക്കാന്‍, പിന്നെയും പിന്നെയും കൊതിതീരെ ലഭിക്കാന്‍. എന്നാല്‍ പുതിയ കാലം ആ വലിയ നന്മയെ പുറങ്കാല്‍ കൊണ്ട് തട്ടിയെറിയുന്ന കാഴ്ചയാണ് നാം കണ്ടു കൊണ്ടിരിക്കുന്നത്. അമ്മയുടെ ഓര്‍മ്മകള്‍ പോലും ഒഴിയാബാധകളാകുകയും ചെയ്യുന്നു. പ്രിയപ്പെട്ട മക്കളെ കാത്ത് വൃദ്ധസദനങ്ങളില്‍ കാത്തിരിക്കുന്ന അമ്മമാര്‍, മക്കള്‍ ഉപേക്ഷിച്ചപ്പോള്‍ ആശുപത്രി വരാന്തകളില്‍ അഭയം തേടിയവര്‍, പണത്തിന്‍റെ പിന്നാലെ പാഞ്ഞപ്പോള്‍ തെരുവുകളിലേക്ക് വലിച്ചെറിയപ്പെട്ട മാ‍തൃത്വങ്ങള്‍...മാതൃദിനം മുന്നിലേക്ക് തരുന്നത് അമ്മമാരുടെ വിവിധ മുഖങ്ങളാണ്.

Today, Mothers Day | അമ്മ: ഉറങ്ങാതെ കൂട്ടിരിക്കുന്ന സ്നേഹം

ആപ്പിളിനെതിരെ പരാതിയുമായി നോകിയ

സെല്‍ഫോണ്‍ വിപണിയിലെ മുന്‍‌നിര കമ്പനികളായ നോകിയയും ആപ്പിളും നിയമയുദ്ധത്തിലേക്ക്. ലോകത്തെ ഏറ്റവും വലിയ സെല്‍ഫോണ്‍ നിര്‍മ്മാണ കമ്പനിയായ നോകിയ ആപ്പിളിനെതിരെ പരാതിയുമായി വീണ്ടും രംഗത്തെത്തി. നോകിയയുടെ പേറ്റന്റ് അവകാശങ്ങള്‍ ആപ്പിളിന്റെ ചില ഉല്‍പ്പന്നങ്ങളില്‍ ഉപയോഗിച്ചെന്നാണ് പരാതി. ആപ്പിളിന്റെ ഏറ്റവും പുതിയ ഉല്‍പ്പന്നമായ ഐപാഡില്‍ പോലും നോകിയയുടെ പേറ്റന്റ് ഉപയോഗിച്ചതായാണ് റിപ്പോര്‍ട്ട്.

ഇത് സംബന്ധിച്ച് യു എസ് ജില്ലാ കോടതിയില്‍ നോകിയ പരാതി നല്‍കിയിട്ടുണ്ട്. നോകിയുടെ പേറ്റന്റ് തട്ടിയെടുത്ത ആപ്പിള്‍ ഉല്‍പ്പന്നങ്ങള്‍ക്കെതിരെ നിയമനടപടി സ്വീകരിക്കുമെന്ന് നോകിയയുടെ നിയമവിദഗ്ധര്‍ അറിയിച്ചു. ടെക്നോളജി വ്യവസായ മേഖലയിലെ പേറ്റന്റ് അവകാശം ചൂണ്ടി കാണിച്ചാണ് ആപ്പിളിനെതിരെ നോകിയ കോടതിയെ സമീപിക്കുന്നത്.

നോകിയയുടെ സ്വന്തം പേരിലുള്ള നിരവധി സാങ്കേതിക പേറ്റന്‍റുകള്‍ ആപ്പിള്‍ ഐഫോണ്‍ ഉപയോഗിക്കുന്നതായി നേരത്തെ തന്നെ പരാതിയുണ്ടായിരുന്നു. നോകിയയുടെ പത്തോളം പേറ്റന്‍റുകളാണ് അനുവാദമില്ലാതെ ഐഫോണ്‍ ഉപയോഗിക്കുന്നത്. നോകിയയുടെ സ്പീച്ച് കോഡിംഗ്, സെക്യൂരിറ്റി, വയര്‍ലെസ് ഡാറ്റാ ട്രാന്‍സ്മിഷന്‍ എന്നീ സാങ്കേതിക വിദ്യകള്‍ ഐഫോണ്‍ തുടക്കം മുതലെ ഉപയോഗിച്ചു കൊണ്ടിരിക്കുന്നു എന്നാണ് നോകിയയുടെ വാദം.

നിലവില്‍ നാല്പതോളം മൊബൈല്‍ കമ്പനികള്‍ നോകിയയുടെ ടെക്നോളജികള്‍ അനുവാദത്തോടെ പണം കൊടുത്ത് ഉപയോഗിച്ചുക്കൊണ്ടിരിക്കുന്ന അവസരത്തിലാണ് ആപ്പിള്‍ ഇത്തരമൊരു രീതി പിന്തുടരുന്നത്. ഇരുപത് വര്‍ഷമായി നോകിയ 90 ബില്യന്‍ ഡോളര്‍ മുതല്‍ മുടക്കിയാണ് ഇത്തരം സാങ്കേതിക വിദ്യകള്‍ വികസിപ്പിച്ചെടുത്തത്.

2007 ല്‍ ഐ ഫോണ്‍ പുറത്തിറങ്ങിയതു മുതല്‍ ഈ സേവനങ്ങള്‍ എല്ലാം ആപ്പിള്‍ ഉപയോഗിക്കുന്നതായി നോകിയ പറഞ്ഞു. നോകിയയ്ക്ക് പുറമെ മറ്റു ചില സെല്‍ഫോണ്‍ കമ്പനികളും ആപ്പിളിനെതിരെ രംഗത്ത് വന്നിരുന്നു

Nokia lodges another complaint against Apple Inc | ആപ്പിളിനെതിരെ പരാതിയുമായി നോകിയ

ഒമ്പത് കമ്പനികളുടെ നഷ്ടം 40,000 കോടി

രാജ്യത്തെ ഏറ്റവും വലിയ ഒമ്പത് കമ്പനികളുടെ വിപണി മൂലധനത്തില്‍ കഴിഞ്ഞ വാരം 40,000 കോടി രൂപയുടെ നഷ്ടം നേരിട്ടു. കഴിഞ്ഞ വാരത്തില്‍ ആഭ്യന്തര വിപണികളില്‍ വന്‍ നഷ്ടമാണ് നേരിട്ടത്. കഴിഞ്ഞ വാരത്തില്‍ പ്രമുഖ പത്ത് കമ്പനികളില്‍ മുകേഷ് അംബാനിയുടെ റിലയന്‍സ് ഇന്‍ഡസ്ട്രീസ് മാത്രമാണ് നേട്ടം കൈവരിച്ചത്.

ഗ്യാസ് കരാര്‍ സംബന്ധിച്ചുള്ള കോടതി വിധി മുകേഷ് അംബാനിയ്ക്ക് അനുകൂലമായതോടെയാണ് റിലയന്‍സ് ഇന്‍ഡസ്ട്രീസ് മികച്ച നേട്ടം കൈവരിച്ചത്. കഴിഞ്ഞ വാരത്തില്‍ 441.5 കോടി രൂപയാണ് റിലയന്‍സ് ഇന്‍ഡസ്ട്രീസ് നേടിയത്.

കഴിഞ്ഞ ആഴ്ചയില്‍ സെന്‍സെക്സിലും, നിഫ്റ്റിയിലും വന്‍ നഷ്ടമാണ് നേരിട്ടത്. കഴിഞ്ഞ വെള്ളിയാഴ്ച വിപണി അടയ്ക്കുമ്പോള്‍ മുംബൈ ഓഹരി സൂചികയായ സെന്‍സെക്സ് 199.10 പോയിന്റ് നഷ്ടത്തിലാണ്. അതേസമയം, അനില്‍ അംബാനിയുടെ കീഴിലുള്ള ആര്‍ എന്‍ ആര്‍ എല്‍ ഓഹരികളും നഷ്ടം നേരിട്ടു.

കഴിഞ്ഞ വാരത്തിലെ അവസാന അഞ്ചു ദിവസം നിക്ഷേപകര്‍ക്ക് നഷ്ടപ്പെട്ടത് 250,000 കോടി രൂപയാണ്. ആഗോള വിപണികളിലെ മാന്ദ്യവും ആഭ്യന്തര ഓഹരി വിപണികളെ ബാധിച്ചു. കഴിഞ്ഞ വാരത്തില്‍ ഏറ്റവും വലിയ നഷ്ടം നേരിട്ട മറ്റൊരു കമ്പനി സ്റ്റര്‍ലൈറ്റ് ഇന്‍ഡസ്ട്രീസാണ്. സ്റ്റര്‍ലൈറ്റ് ഇന്‍ഡസ്ട്രീസ് ഓഹരികള്‍ 9,600 കോടി രൂപയുടെ നഷ്ടം നേരിട്ടു.

ജിന്‍ഡല്‍ സ്റ്റീല്‍ ആന്‍ഡ് പവര്‍(8,895 കോടി), ഐ സി ഐ സി ഐ ബാങ്ക്(8,256 കോടി) ഹിന്ദുസ്ഥാന്‍ സിങ്ക്(6,784 കോടി), ഇന്‍ഫോസിസ് ടെക്നോളജീസ്(6,685 കോടി), എച്ച് ഡി എഫ് സി ബാങ്ക്(6,612 കോടി), എം എം ടി സി(6,458 കോടി), ടാറ്റാ മോട്ടോര്‍സ്(6,299 കോടി) എന്നീ ഓഹരികളും കഴിഞ്ഞ വാരത്തില്‍ വന്‍ നഷ്ടത്തോടെയാണ് വ്യാപാരം നിര്‍ത്തിയത്

Nine of top-10 cos lose Rs 40k cr in m-cap, RIL lone gainer | ഒമ്പത് കമ്പനികളുടെ നഷ്ടം 40,000 കോടി

ചൈന മൊബൈല്‍ നിര്‍മ്മാണ കേന്ദ്രം ഇന്ത്യയിലേക്ക്

ചൈന വയര്‍ലെസ് ടെക്നോളജീസ് ഇന്ത്യയില്‍ മൊബൈല്‍ ഹാന്‍ഡ്സെറ്റ് നിര്‍മ്മാണ ഫാക്ടറി തുടങ്ങുന്നു. കൂള്‍പാഡ് കമ്മ്യൂണിക്കേഷനുമായി ചേര്‍ന്ന് 2012ല്‍ തന്നെ മൊബൈല്‍ ഹാന്‍ഡ് സെറ്റ് നിര്‍മ്മാണ കേന്ദ്രം തുടങ്ങുമെന്ന് ചൈന വയര്‍ലെസ് ടെക്നോളജീസ് അറിയിച്ചു. പുതിയ മൊബൈല്‍ നിര്‍മ്മണ കേന്ദ്രം തുടങ്ങാനും ഗവേഷണ കേന്ദ്രത്തിനുമായി മുന്നൂറ് കോടി മുതല്‍ നാന്നൂറ് കോടി രൂപ വരെ നിക്ഷേപിക്കുമെന്നും കമ്പനി അറിയിച്ചു.

നിലവില്‍ ചൈനയില്‍ നിന്നുള്ള ടെലികോം ഉല്‍പ്പന്നങ്ങള്‍ രാജ്യത്ത് വില്‍ക്കുന്നതിന് വിലക്ക് നിലനില്‍ക്കുന്ന അവസരത്തിലാണ് ചൈന വയര്‍ലെസ് ടെക്നോളജീസ് ഇന്ത്യയില്‍ ഫാക്ടറി തുടങ്ങുന്നത്. ചൈനയിലെ ഹുവായ് ടെക്നോളജീസിന്റെ ടെലികോം ഉല്‍പ്പന്നങ്ങള്‍ക്ക് ഇന്ത്യയില്‍ വിലക്കുണ്ട്.

ലോകത്ത് ഏറ്റവും കൂടുതല്‍ ടെലികോം ഉല്‍പ്പന്നങ്ങള്‍ വില്‍പ്പന നടക്കുന്ന രാജ്യമാണ് ഇന്ത്യ. നേരത്തെ ചൈനയില്‍ നിന്നുള്ള മൊബൈല്‍ സെറ്റുകള്‍ക്ക് ഇന്ത്യയില്‍ ജനപ്രീതിയായിരുന്നു. രാജ്യത്ത് ഏകദേശം 600 ദശലക്ഷം മൊബൈല്‍ ഉപയോക്താക്കളുണ്ടെന്നാണ് കണക്ക്.

കഴിഞ്ഞ വര്‍ഷം മാത്രം ഇന്ത്യയില്‍ 100 ദശലക്ഷം ഹാന്‍ഡ് സെറ്റുകളാണ് വില്‍പ്പന നടന്നത്. നിലവില്‍ രാജ്യത്തെ ടെലികോം ഉല്‍പ്പന്ന വിപണിയില്‍ നോകിയ തന്നെയാണ് ഒന്നാം സ്ഥാനത്ത്. തൊട്ടു താഴെയായി സാംസങ്, കാര്‍ബണ്‍, മൈക്രോമാക്സ്, ലാവ കമ്പനികളുടെ ഉല്‍പ്പന്നങ്ങളും വിപണിയിലുണ്ട്

China Mobile mulls handset factory in India by 2012 | ചൈന മൊബൈല്‍ നിര്‍മ്മാണ കേന്ദ്രം ഇന്ത്യയിലേക്ക്

പുതിയ മിസ്തുബിഷി കാര്‍ ഇന്ത്യയിലേക്ക്


മിസ്തുബിഷി മോട്ടോര്‍സിന്റെ പുതിയ കാറുകള്‍ ഇന്ത്യയിലേക്ക്. ഹിന്ദുസ്ഥാന്‍ മോട്ടോര്‍സുമൊത്ത് ചേര്‍ന്നാണ് മിസ്തുബിഷിയുടെ പുതിയ കാറുകള്‍ ഇന്ത്യന്‍ വിപണിയിലെത്തിക്കുക. ലോകത്ത് ഏറ്റവും കുടുതല്‍ കാറുകള്‍ വില്‍പ്പന നടക്കുന്ന രാജ്യങ്ങളിലൊന്നായ ഇന്ത്യയില്‍ വന്‍ പ്രതീക്ഷകളുമായാണ് മിസ്തുബിഷിയെത്തുന്നത്.

പുതിയ മോഡല്‍ കാറുകളോട് എന്നും പ്രിയം കാണിച്ചിട്ടുള്ള ഇന്ത്യന്‍ ഉപയോക്താക്കളെ ലക്‍ഷ്യമിട്ട് മികച്ച സാങ്കേതിക സേവനങ്ങളുള്ള കാറുമായാണ് മിസ്തുബിഷി ഇന്ത്യയിലെത്തുന്നത്. മിസ്തുബിഷി പജെറോയുടെ പുതിയ പതിപ്പാണ് രാജ്യത്തെ വിപണിയിലെത്തിക്കുന്നത്.

നേരത്തെ മിസ്തുബിഷിയുടെ ഔട്ട്‌‌ലാന്‍ഡര്‍ മോഡല്‍ ഇന്ത്യന്‍ വിപണിയില്‍ ലഭ്യമാണ്. ഈ മോഡല്‍ കാറിന് ഏകദേശം 19.95 ലക്ഷം രൂപയാണ് വില. മിസ്തുബിഷിയുടെ മറ്റൊരു മോഡല്‍ വാഹനം ബി എസ് നാല് വിപണിയില്‍ നിരവധി സാങ്കേതിക പ്രശ്നങ്ങള്‍ നേരിട്ടുക്കൊണ്ടിരിക്കുകയാണ്.

മിസ്തുബിഷിയുടെ ബി എസ് നാല് കാര്‍ രാജ്യത്ത് പതിനായിരം യൂണിറ്റുകള്‍ വിറ്റിട്ടുണ്ടെന്ന് കമ്പനി വൃത്തങ്ങള്‍ അറിയിച്ചു. എന്നാല്‍, കഴിഞ്ഞ സാമ്പത്തിക വര്‍ഷത്തില്‍ കേവലം 2200 യൂണിറ്റുകള്‍ മാത്രമാണ് വില്‍ക്കാനായതെന്നും റിപ്പോര്‍ട്ടില്‍ വ്യക്തമാക്കുന്നു.

ഔട്ട്ലാന്‍ഡറിന്റെ പുതിയ പതിപ്പ് വിപണിയിലെത്തിയിട്ടുണ്ട്. പജെറോയുടെ പുതിയ പതിപ്പ് ഉടന്‍ തന്നെ വിപണിയിലെത്തിക്കുമെന്നും ഹിന്ദുസ്ഥാന്‍ മോട്ടോര്‍സ് മേധാവി വിജയ് കുമാര്‍ അറിയിച്ചു. ഹിന്ദുസ്ഥാന്‍ മോട്ടോര്‍സുമായി ചേര്‍ന്ന് മിസ്തുബിഷി നിലവില്‍ ലാന്‍സറും സീഡിയയും വില്‍പ്പന നടത്തുന്നുണ്ട്

New Mitsubishi Cars Coming to India | പുതിയ മിസ്തുബിഷി കാര്‍ ഇന്ത്യയിലേക്ക്

ഇറാഖില്‍ ആക്രമണ പരമ്പര: 31 മരണം

ഇറാഖില്‍ സുരക്ഷാസേനയെ ലക്‍ഷ്യമിട്ട്‌ വിവിധ സ്ഥലങ്ങളില്‍ നടന്ന സ്ഫോടനങ്ങളിലും വെടിവയ്പ്പിലും 31 പേര്‍ കൊല്ലപ്പെട്ടു. നിരവധി പേര്‍ക്ക് പരുക്കേറ്റു. സേനാ, പൊലിസ്‌ ചെക്ക്‌ പോസ്റ്റുകളുടെ നേര്‍ക്ക്‌ അത്യാധുനിക തോക്കുകളുമായി ആക്രമണം നടത്തി ഏഴു സുരക്ഷാ സൈനികരെ വധിച്ചാണ് ആക്രമികള്‍ ആക്രമണ പരമ്പരയ്ക്ക് തുടക്കമിട്ടത്. രാവിലെ ആറുമണിയോടെയായിരുന്നു ആക്രമണം.

ബാഗ്ദാദില്‍നിന്ന്‌ 60 കിലോമീറ്റര്‍ അകലെയുള്ള സുവൈറയില്‍ മുസ്‌ലിം പള്ളിക്കു സമീപമുണ്ടായ ഇരട്ട ബോംബ്‌ സ്ഫോടനത്തില്‍ 11 പേരാണ്‌ കൊല്ലപ്പെട്ടത്‌. ഈ‍ ആക്രമണത്തില്‍ 70 പേര്‍ക്കു പരുക്കേറ്റു.
ബാഗ്ദാദിന്‌ പടിഞ്ഞാറുള്ള ഫലൂജയിലുണ്ടായ സ്ഫോടനത്തില്‍ നാലു പേര്‍ കൊല്ലപ്പെട്ടു.

11 പേര്‍ക്ക് പരുക്കേറ്റു. മൊസൂളിലുണ്ടായ മറ്റൊരു ആക്രമണത്തില്‍ ഏഴ് പേര്‍ കൊല്ലപ്പെട്ടു. പരുക്കേറ്റവരില്‍ അധികവും സുരക്ഷാ ഉദ്യോഗസ്ഥരാണ്‌. ഈ വര്‍ഷം ഏപ്രില്‍ 23ന്‌ ഉണ്ടായ ബോംബ്‌ സ്ഫോടനത്തില്‍ 58 പേര്‍ കൊല്ലപ്പെട്ടിരുന്നു. ഇതിനുശേഷം നടക്കുന്ന ഏറ്റവും രൂക്ഷമായ ആക്രമണമാണ് ഇന്ന് നടന്നത്

Serial bomb attacks in Iraq, 31 killed | ഇറാഖില്‍ ആക്രമണ പരമ്പര: 31 മരണം

ട്വിറ്ററില്‍ ചാവേസാണ് താരം!


ജനപ്രിയ മൈക്രോബ്ലോഗിംഗ് സൈറ്റായ ട്വിറ്ററില്‍ വെനിസ്വലന്‍ പ്രസിഡന്റ് ഹ്യൂഗോ ചാവേസാണ് താരം. ഓരോ നിമിഷവും ചാവേസിന്റെ ട്വിറ്റര്‍ ജനപ്രീതി വര്‍ധിച്ചുക്കൊണ്ടിരിക്കുകയാണ്. രണ്ടാഴച മുമ്പ് അംഗത്വമെടുത്ത ചാവേസ് വൈനിസ്വലന്‍ ട്വിറ്റര്‍ അംഗങ്ങളില്‍ ഒന്നാം സ്ഥാനത്തെത്തി. ട്വിറ്ററില്‍ 237,000 പേരാണ് ചാവേസിനെ പിന്തുടരുന്നത്. രാജ്യത്തെ എന്തു പ്രശ്നങ്ങള്‍ സംബന്ധിച്ചും ട്വീറ്റ് ചെയ്യാമെന്നിരിക്കെ ചാവേസിനെ തേടി നിരവധി സന്ദേശങ്ങളാണ് വന്നുക്കൊണ്ടിരിക്കുന്നത്.

തിരക്കിനിടയില്‍ എല്ലാവര്‍ക്കും തിരിച്ച് സന്ദേശം അയക്കാന്‍ സാധിക്കുന്നില്ലെന്നും ട്വിറ്റര്‍ സന്ദേശങ്ങള്‍ കൈകാര്യം ചെയ്യാനായി പ്രത്യേകം സാങ്കേതിക വിദഗ്ധരെ നിയമിക്കാനും ചാവേസിന് പദ്ധതിയുണ്ട്. ചാവേസിന് ലഭിച്ചുക്കൊണ്ടിരിക്കുന്ന ട്വീറ്റുകള്‍ക്ക് ഉത്തരം നല്‍കാനായി ഇരുന്നൂറ് പേരെ നിയമിക്കാനാണ് പദ്ധതി. ജനങ്ങളോട് സംസാരിക്കാന്‍ പറ്റിയ ഏറ്റവും നല്ല മീഡിയ ട്വിറ്ററാണെന്നും ചാവേസ് പറഞ്ഞു.

ചാവേസ് പങ്കെടുക്കുന്ന എല്ലാ ചടങ്ങുകളിലും ടെലിവിഷന്‍ പരിപാടികളിലും ട്വിറ്റര്‍ വിഷയം വന്നതോടെ പിന്തുടരുന്നവരുടെ എണ്ണം വര്‍ധിക്കുകയായിരുന്നു. ഏപ്രില്‍ 27ന് ഔദ്യോഗിക സന്ദര്‍ശനത്തിനായി ബ്രസീസിലെത്തിയെന്ന് സ്പാനിഷ് ഭാഷയില്‍ സന്ദേശം നല്‍കിയാണ് ചാവേസ് 'ചാവേസ് കാന്‍ഡന്‍ഗ' എന്ന ട്വിറ്റര്‍ അക്കൗണ്ടിന് തുടക്കമിട്ടത്. നേരത്തെ ഇന്റര്‍നെറ്റ് സൗഹൃദക്കൂട്ടായ്മകളിലൂടെ സര്‍ക്കാറിനെതിരെ പ്രവര്‍ത്തിക്കുന്ന ശത്രുക്കളെ സമാന സൈറ്റുകളിലൂടെ പ്രതിരോധിക്കാന്‍ കഴിഞ്ഞ മാസം ചാവേസ് ആഹ്വാനം ചെയ്തിരുന്നു.

Chavez rockets to No. 1 on Twitter in Venezuela | ട്വിറ്ററില്‍ ചാവേസാണ് താരം!

യുവാക്കളേ വേണ്ടാത്ത പൊല്ലാപ്പെന്തിന് ?


WD
നമ്മുടെ യുവാക്കള്‍ മടിയരാവുന്നോ ? ആവുന്നു എന്നാണ് അടുത്ത കാലത്ത് പുറത്തുവിട്ട ഒരു സര്‍‌വേ ഫലം വെളിവാക്കുന്നത്. ഇന്ത്യയില്‍ ഇരുപതു മുതല്‍ മുപ്പത് വയസ്സുവരെ പ്രായമുള്ള യുവാക്കളില്‍ കൊളസ്ട്രോള്‍ നില വളരെ ഉയര്‍ന്ന നിരക്കിലാണത്രേ.

ഇപ്പോഴത്തെ കണക്കനുസരിച്ച് ഒരു മാസം 20 യുവാക്കളെങ്കിലും പുതിയതായി കൊളസ്ട്രോള്‍ ചികിത്സ തേടി എത്തുന്നുണ്ടെന്ന് ഡോക്ടര്‍‌മാരും സമ്മതിക്കുന്നു. ഒരു ആശങ്കയുടെ പുറത്ത് സ്വയം രക്ത പരിശോധന നടത്തി എത്തുന്ന യുവാക്കളില്‍ മിക്കവരുടെയും കൊളസ്ട്രോള്‍ നില ഉയര്‍ന്നതാണെന്ന് ഡോക്ടര്‍മാര്‍ പറയുന്നത് ഇതിന്‍റെ ഗൌരവം വര്‍ദ്ധിപ്പിക്കുന്നു.

എന്നാല്‍, യുവാക്കള്‍ക്ക് ആദ്യം തന്നെ മരുന്ന് നിര്‍ദ്ദേശിക്കാറില്ല എന്നാണ് ഡോക്ടര്‍മാര്‍ പറയുന്നത്. ആറ് മാസത്തോളം ജീവിത ശൈലിയില്‍ മാറ്റം വരുത്താന്‍ ഒരു അവസരം നല്‍കുകയാണ് ആദ്യപടി. അതായത്, ബര്‍ജറും പിസയും കോളകളും പോലെയുള്ളവ ഭക്ഷണക്രമത്തിലെ മുഖ്യ ഇനങ്ങളാക്കാതിരിക്കാനുള്ള ഒരു അവസരം

സ്പേം കൌണ്ട് കുറവോ? സോയ വേണ്ടെന്നു വയ്ക്കൂ


PRO
സ്പേം കൌണ്ട് കുറവുള്ളവര്‍ ശ്രദ്ധിക്കുക, നിങ്ങള്‍ ഭക്ഷണത്തില്‍ നിന്ന് സോയ ബീന്‍സ് ഒഴിവാക്കണം. സോയ ബീജോത്പാദന സംവിധാനത്തെ പ്രതികൂലമായി ബാധിക്കുമെന്ന് ഒരു പുതിയ പഠനത്തില്‍ പറയുന്നു. ചൈനയിലെ വെന്‍സോ മെഡിക്കള്‍ കോളജിലെ ഗവേഷകരാണ് പഠനം നടത്തിയത്. പഠനം ഏഷ്യന്‍ ജേര്‍ണല്‍ ഓഫ് ആണ്‌ഡ്രോളജിയില്‍ പ്രസിദ്ധീകരിച്ചിട്ടുണ്ട്.

സോയ ബീന്‍സില്‍ സ്ത്രീ ലൈംഗിക ഹോര്‍മോണുകളെ അനുകരിക്കുന്ന സ്വാഭാവിക രാസവസ്തുക്കള്‍ ഉണ്ടെന്ന് ഒരു പഠനം തെളിയിച്ചതിനു പിന്നാലെയാണ് ബീജോത്പാദനത്തെയും സോയ പ്രതികൂലമായി ബാധിക്കുമെന്ന് തെളിഞ്ഞിരിക്കുന്നത്. സോയയില്‍ അടങ്ങിയിരിക്കുന്ന ‘ജെനിസ്റ്റിന്‍’ എന്ന രാസപദാര്‍ത്ഥമാണ് ബീജോത്പാദനത്തിനു ഭീഷണി സൃഷ്ടിക്കുന്നത്. ബീജോത്പാദനത്തിനു സഹായിക്കുന്ന എന്‍സൈമുകളുടെ പ്രവര്‍ത്തനത്തെ ജെനിസ്റ്റിന്‍ പ്രതികൂലമായി ബാധിക്കുന്നു എന്നാണ് ഇതെ കുറിച്ച് ചൈനയില്‍ നടന്ന ഏറ്റവും പുതിയ പഠനത്തില്‍ പറയുന്നത്.

സോയ ആഹാരമാക്കുമ്പോള്‍ അതില്‍ അടങ്ങിയിരിക്കുന്ന ഐസൊഫ്ലാവന്‍സ് പ്രത്യുത്പാദന അവയവങ്ങളില്‍ എത്തിച്ചേരും. ഇത്തരത്തില്‍, ഈസ്ട്രജന്റെ പ്രവര്‍ത്തനങ്ങള്‍ പ്രകടമാക്കുന്ന ഏജന്റിന്റെ സാന്നിധ്യം പുരുഷന്‍‌മാരുടെ പ്രത്യുത്പാദന സംബന്ധമായ പ്രവര്‍ത്തനങ്ങളെ പ്രതികൂലമായി ബാധിക്കുമെന്നാണ് പഠനം നടത്തിയവര്‍ കരുതുന്നത്.

പാല്‍ ഉല്‍പ്പന്നങ്ങളില്‍ സോയയുടെ സാന്നിധ്യം വളരെയധികമാണ്. അതിനാല്‍, ഇത്തരം ഉത്പന്നങ്ങള്‍ കൂടുതല്‍ ഉപയോഗിക്കുന്നവരില്‍ ജെനിസ്റ്റിന്‍ നില വളരെയധികം ഉയരാന്‍ സാധ്യതയുണ്ടെന്നാണ് കണ്ടെത്തല്‍. എന്നാല്‍, ജെനിസ്റ്റിന് പുരുഷ പ്രത്യുത്പാദനവുമായി ബന്ധമൊന്നുമില്ല എന്ന കേംബ്രിഡ്ജ് സര്‍വകലാശാല പ്രഫസര്‍ യുവാന്‍ ഹഗ്സിന്റെ കണ്ടെത്തലിനു നേര്‍ വിപരീതമാണ് ഇപ്പോഴത്തെ കണ്ടെത്തല്‍

Sperm count problem? Avoid Soy Beans | സ്പേം കൌണ്ട് കുറവോ? സോയ വേണ്ടെന്നു വയ്ക്കൂ

തമിഴ്നാട്ടില്‍ ‘മമ്മുക്ക മിമിക്രി’ തരംഗം!


Mammootty
PRO
PRO
തമിഴ്നാട്ടില്‍ എവിടെ മിമിക്രി അവതരിപ്പിച്ചാലും മലയാളികളുടെ പ്രിയതാരമായ മമ്മൂട്ടിയെ അനുകരിക്കുന്ന ഐറ്റമില്ലാതെ പരിപാടി അവസാനിക്കില്ല. എം‌ജിആറെന്ന് അറിയപ്പെട്ടിരുന്ന എം‌ജി രാമചന്ദ്രനും വില്ലന്‍ വേഷങ്ങള്‍ ചെയ്തിരുന്ന എം‌എന്‍ നമ്പ്യാര്‍ക്കും ശേഷം തമിഴ്നാട്ടിലെ മിമിക്രിക്കാര്‍ക്ക് പ്രിയപ്പെട്ട മലയാളി താരമായിരിക്കുകയാണ് മമ്മൂട്ടി. രജനീകാന്തും മമ്മൂട്ടിയും ഒരുമിച്ച് അഭിനയിച്ച ‘ദളപതി’ എന്ന സിനിമയിലെ രംഗങ്ങളാണ് മമ്മൂട്ടിയെ അനുകരിക്കാനായി മിമിക്രിക്കാര്‍ ആശ്രയിക്കുന്നത്.

വെറുതെ ഉണ്ടായതല്ല, ഈ ‘മമ്മൂട്ടി മിമിക്രി’ തരംഗം. തമിഴ്നാട്ടില്‍ 2010-ലെ ആദ്യ സൂപ്പര്‍ ഹിറ്റായ തമിഴ്‌പടം എന്ന സിനിമയാണ് മമ്മൂട്ടി തരംഗത്തിന് കാരണം. തമിഴ് സിനിമാരംഗത്തെ പരിഹസിക്കുന്ന ഒരു സിനിമയാണ് തമിഴ്‌പടം. സിനിമയിലെ വിഡ്ഡിത്തരങ്ങളും യുക്തിയില്ലായ്മയും കോര്‍ത്തിണക്കിക്കൊണ്ട് സി‌എസ് അമുദം സംവിധാനം ചെയ്ത തമിഴ്പടത്തില്‍ മമ്മൂട്ടിയെ അനുകരിക്കുന്ന തകര്‍പ്പന്‍ രംഗമുണ്ട്.

നായകന്റെ മര്‍ദ്ദനമേറ്റ് ആശുപത്രിയിലെത്തിയ തന്റെ ഗുണ്ടയെ മമ്മൂട്ടി സന്ദര്‍ശിക്കാന്‍ എത്തുന്ന രംഗമാണ് സിനിമയില്‍ ഉള്‍‌പ്പെടുത്തിയിരിക്കുന്നത്. നല്ല ബാസുള്ള ശബ്ദത്തില്‍ ദളപതിയിലെ മമ്മൂട്ടിയുടെ മാനറിസങ്ങളെ സീനുവെന്ന മിമിക്രി ആര്‍ട്ടിസ്റ്റ് അനുകരിക്കുമ്പോള്‍ തീയേറ്ററുകളില്‍ കരഘോഷം മുഴങ്ങുന്നു.

സിനിമാപ്പട്ടി എന്ന ഗ്രാമത്തെ ചുറ്റിപ്പറ്റിയുള്ള കഥയാണിത്. ഇവിടെനിന്നുള്ള യുവാക്കള്‍ സിനിമയില്‍ അഭിനയിക്കാനുള്ള മോഹവുമായി ചെന്നൈയിലേക്ക് വണ്ടി കയറുന്നു. എന്നാല്‍ ഒരു സിനിമയില്‍ ചാന്‍സ് ലഭിച്ചുകഴിഞ്ഞാല്‍ ‘ഞാനാണ് അടുത്ത മുഖ്യമന്ത്രി’ എന്ന് അഹങ്കരിക്കാന്‍ തുടങ്ങുന്നു. ഇങ്ങിനെ പലരും ചെയ്യുകയാല്‍ ഗ്രാമത്തിലേക്കുള്ള സഹായമെല്ലാം സര്‍ക്കാര്‍ നിര്‍ത്തുന്നു. കാലക്രമത്തില്‍ സിനിമാപ്പട്ടിയെ ഒരു ശത്രുവായി സര്‍ക്കാര്‍ കാണാന്‍ തുടങ്ങുന്നു.

സിനിമാപ്പട്ടിയില്‍ നിന്ന് ആരും ചെന്നൈയിലേക്ക് പോകാതിരിക്കാനായി, ഇനി ഗ്രാമത്തില്‍ ആണ്‍‌കുട്ടികള്‍ ഉണ്ടായാല്‍ കൊന്നുകളയണമെന്ന് ഗ്രാമത്തലവന്‍ പ്രഖ്യാപിക്കുന്നു. ഇതിനിടെ ദരിദ്രരായ മാതാപിതാക്കള്‍ക്ക് ഒരു ആണ്‍‌കുട്ടി പിറക്കുകയും അവനെ മുത്തശ്ശി ചെന്നൈയിലേക്ക് കടത്തുകയും ചെയ്യുന്നു. സെക്കന്റുകള്‍ക്കുള്ളില്‍ വളര്‍ന്നുവലുതാകുന്ന അവന്‍ വീരനായകനാകുന്നതും രഹസ്യപ്പോലീസാകുന്നതും ശത്രുക്കളെ കൊന്നൊടുക്കുന്നതും അവസാനം തന്റെ മാതാപിതാക്കളെ കണ്ടെത്തുന്നതുമാണ് സിനിമയുടെ പ്രമേയം.

കമലാഹാസനും രജനീകാന്തും വിജയകാന്തും തൊട്ട് സൂര്യയെയും ചിലമ്പരശനെയും വരെ ഈ സിനിമയില്‍ കണക്കിന് കളിയാക്കുന്നുണ്ട്. ആണ്‍‌കുട്ടികളെ കൊന്നുകളയാന്‍ വിസമ്മതിക്കുന്നവര്‍ ചിലമ്പരശന്റെ സിനിമ 100 തവണ കാണേണ്ടിവരും എന്ന ശിക്ഷയാണ് ഗ്രാമത്തലവന്‍ വിധിക്കുന്നത്. പോത്തുകളെ അഴിച്ചുവിട്ടും (അന്യന്‍ സിനിമ) വിവിധ സാധനങ്ങള്‍ ഉപയോഗിച്ചും (കമല്‍ കുള്ളനായി അഭിനയിച്ച അപൂര്‍വ സഹോദരങ്ങള്‍ എന്ന സിനിമ) വില്ലനെ കൊല്ലാന്‍ ശ്രമിക്കുന്ന നായകനെ ഇതില്‍ കാണാം. കാക്ക കാക്ക, ഗജിനി എന്നീ സിനിമകളെയും കണക്കിന് കളിയാക്കുന്നുണ്ട്.

Mammootty is getting imitated in TN | തമിഴ്നാട്ടില്‍ ‘മമ്മുക്ക മിമിക്രി’ തരംഗം!

ഇടതു സര്‍ക്കാരിനെതിരെ വീണ്ടും ഇടയലേഖനം

ഇടതു സര്‍ക്കാറിനെതിരെ പള്ളിയില്‍ വീണ്ടും ഇടയലേഖനം വായിച്ചു. ഭൂമി പ്രശ്‌നങ്ങള്‍ ഉടന്‍ പരിഹരിക്കണമെന്നാവശ്യപ്പെട്ട് ഇടുക്കി രൂപതയാണ് ഇടയലേഖനം വായിച്ചിരിക്കുന്നത്. വിവിധ ഭൂമി ഉടമസ്ഥതയുമായി ബന്ധപ്പെട്ടുള്ള എല്ലാ പ്രശ്നങ്ങളും ഉടന്‍ പരിഹരിക്കണം.

കൈയ്യേറ്റവും കുടിയേറ്റവും സര്‍ക്കാര്‍ രണ്ടായിക്കാണണമെന്ന് സര്‍ ബിഷപ്പ് മാര്‍ മാത്യു ആനിക്കുഴിക്കാട്ടില്‍ ഞായറാഴച രാവിലെ പള്ളിയില്‍ വായിച്ച ഇടയലേഖനത്തിലൂടെ ആവശ്യപ്പെട്ടു. ഇടുക്കി രൂപതയുടെ കീഴിലുള്ള എല്ലാ പള്ളികളിലും ഇതേ ഇടയലേഖനം വായിച്ചു.

ഭൂമി പ്രശ്‌നങ്ങള്‍ ചര്‍ച്ച ചെയ്യാന്‍ റവന്യൂമന്ത്രി സര്‍വ്വകക്ഷിയോഗം വിളിക്കണമെന്നും ഇടയലേഖനത്തില്‍ ആവശ്യപ്പെട്ടു. ഭൂമി പ്രശ്നങ്ങള്‍ സംബന്ധിച്ച സര്‍വ്വകക്ഷി യോഗം വിളിക്കാമെന്ന റവന്യൂ മന്ത്രിയുടെ വാഗ്ദാനം ആഴ്ചകളായിട്ടും തയ്യാറായിട്ടില്ലെന്നും ഇടയലേഖനത്തില്‍ കുറ്റപ്പെടുത്തുന്നു.

ഇടുക്കിയിലെ ഭൂമി പ്രശ്നങ്ങള്‍ക്കു പരിഹാരം കാണുന്നതിനും കര്‍ഷകര്‍ക്ക് ഉപാധിരഹിത പട്ടയം നല്‍കുന്നതു സംബന്ധിച്ച ആലോചന നടത്തുന്നതിനും കട്ടപ്പനയില്‍ സര്‍വകക്ഷി യോഗം വിളിക്കാമെന്നു റവന്യൂമന്ത്രി കെ പി രാജേന്ദ്രന്‍ ഉറപ്പു നല്‍കിയിരുന്നു. ഹൈറേഞ്ച് സംരക്ഷണ സമിതി പ്രവര്‍ത്തകര്‍ക്കാണു മന്ത്രി ഉറപ്പു നല്‍കിയത്.

അര്‍ഹരായ എല്ലാ കുടിയേറ്റക്കാര്‍ക്ക് പട്ടയം നല്‍കാന്‍ വേണ്ട നടപടി സ്വീകരിക്കണം. ഭൂമി പ്രശ്‌നങ്ങള്‍ക്ക് പരിഹാരം കണ്ടില്ലെങ്കില്‍ മെയ് പതിനൊന്നു മുതല്‍ ഇടുക്കി കളക്ട്രേറ്റ് ഉപരോധിക്കുമെന്നും ഇടയലേഖനത്തിലൂടെ അറിയിച്ചിട്ടുണ്ട്

Idukki roopatha's 'idayalekhanam' against state government | ഇടതു സര്‍ക്കാരിനെതിരെ വീണ്ടും ഇടയലേഖനം

മുഖ്യമന്ത്രി പോര, മന്ത്രിമാരും: സിപിഎം സെക്രട്ടേറിയേറ്റ്


PRO
മുഖ്യമന്ത്രിയുടെ പ്രവര്‍ത്തനം പോരെന്ന് പണ്ടേ അഭിപ്രായമുണ്ടെങ്കിലും ഇപ്പോള്‍ വീണ്ടും അത് അംഗീകരിച്ചിരിക്കുകയാണ്. തിരുവനന്തപുരത്ത് ചേരുന്ന സി പി എം സംസ്ഥാന സെക്രട്ടേറിയേറ്റില്‍ ആണ് മുഖ്യമന്ത്രിക്ക് എതിരെ വിമര്‍ശനമുയര്‍ന്നിരിക്കുന്നത്. മുഖ്യമന്ത്രിക്ക് എതിരെ മാത്രമല്ല മന്ത്രിമാര്‍ക്കെതിരെയും വിമര്‍ശനം ഉയര്‍ന്നു. തെറ്റുതിരുത്തല്‍ രേഖയുടെ അടിസ്ഥാനത്തില്‍ തയ്യാറാക്കിയ രേഖയിലാണ് ഇക്കാര്യം ഉള്ളത്. സംസ്ഥാന സെക്രട്ടറി പിണറായി വിജയനാണ് രേഖ അവതരിപ്പിച്ചത്.

മുഖ്യമന്ത്രിയടക്കമുള്ള സി പി എം. മന്ത്രിമാരുടെയും അവരുടെ ഓഫീസുകളുടെയും പ്രവര്‍ത്തനത്തില്‍ പോരായ്മകളുണ്ടെന്നായിരുന്നു സെക്രട്ടേറിയേറ്റ് വിലയിരുത്തല്‍. കേന്ദ്രക്കമ്മിറ്റി അംഗീകരിച്ച തെറ്റുതിരുത്തല്‍ രേഖയുടെ അടിസ്ഥാനത്തില്‍ കേരളത്തിലെ പാര്‍ട്ടി നേതാക്കളുടെയും സംസ്ഥാന ഘടകത്തിന്‍റെയും പ്രവര്‍ത്തനം വിലയിരുത്തിയാണ് സെക്രട്ടേറിയറ്റ് യോഗത്തില്‍ രേഖ സമര്‍പ്പിച്ചത്.

പാര്‍ട്ടി മന്ത്രിമാരുടെ പ്രവര്‍ത്തനത്തിലെ പോരായ്മകള്‍ മാത്രമല്ല രേഖയിലുള്ളത് എന്നതും ശ്രദ്ധേയമാണ്. പാര്‍ട്ടി സംസ്ഥാന നേതൃത്വത്തിന്‍റെ പ്രവര്‍ത്തനത്തിലെ പോരായ്മകളും രേഖയില്‍ ചൂണ്ടിക്കാട്ടുന്നുണ്ട്. പാര്‍ട്ടി സംസ്ഥാന സെന്‍ററിന്‍റെ പ്രവര്‍ത്തനങ്ങളുടെ ആസൂത്രണത്തിലും കുറവുകള്‍ സംഭവിച്ചിട്ടുണ്ടെന്ന് രേഖ തുറന്ന് സമ്മതിക്കുന്നുണ്ട്.

സെക്രട്ടേറിയേറ്റ് ഇന്നും തുടരും. തെറ്റ് തിരുത്തല്‍ രേഖയുടെ ചര്‍ച്ച പൂര്‍ത്തിയാക്കിയശേഷം ഇന്ന് സെക്രട്ടേറിയറ്റ് യോഗം മുഖ്യമന്ത്രിയുടെ പൊളിറ്റിക്കല്‍ സെക്രട്ടറി നിയമനം അടക്കമുള്ള വിഷയങ്ങള്‍ ചര്‍ച്ച ചെയ്യും. സെക്രട്ടേറിയറ്റ് യോഗത്തിന്‍റെ തുടര്‍ച്ചയായി മൂന്നു ദിവസം സംസ്ഥാന സമിതിയും യോഗം ചേരുന്നുണ്ട്.

CPM Secretariate against CM | മുഖ്യമന്ത്രി പോര, മന്ത്രിമാരും: സിപിഎം സെക്രട്ടേറിയേറ്റ്

ഇറാനില്‍ സ്ത്രീയുള്‍പ്പെടെ അഞ്ചു പേരെ തൂക്കിലേറ്റി

ഇറാനില്‍ ഒരു സ്ത്രീ ഉള്‍പ്പെടെ അഞ്ച് പേരെ ഞായറാഴ്ച തൂക്കിലേറ്റിയതായി ഐ‌ആര്‍‌എന്‍‌എ വാര്‍ത്താ ഏജന്‍സി വെളിപ്പെടുത്തി. നിരവധി ബോംബ് സ്ഫോടനങ്ങള്‍ ഉള്‍പ്പെടെയുള്ള ദേശവിരുദ്ധ പ്രവര്‍ത്തനങ്ങള്‍ക്കാണ് ഇവര്‍ക്ക് വധശിക്ഷ നല്‍കിയതെന്നും റിപ്പോര്‍ട്ടില്‍ പറയുന്നു.

ഷിരിന്‍ അലാംഹൌലി എന്ന വനിതയാണ് തൂക്കിലേറ്റപ്പെട്ട വനിത. ടെഹ്‌റാനിലെ എവിന്‍ ജയിലിലാണ് ശിക്ഷ നടപ്പാക്കിയത്.

രാജ്യത്തെ നിരവധി നഗരങ്ങളില്‍ ബോംബ് സ്ഫോടനം നടത്തിയത് ഉള്‍പ്പെടെയുള്ള ഭീകര പ്രവര്‍ത്തനത്തിനാണ് ഇവരെ തൂക്കിലേറ്റിയത് എന്ന് പ്രോസിക്യൂട്ടറുടെ ഓഫീസില്‍ നിന്നുള്ള വാര്‍ത്താക്കുറിപ്പില്‍ പറയുന്നുണ്ട്. എന്നാല്‍, ഏതൊക്കെ നഗരങ്ങളാണ് ഇവര്‍ ആക്രമിച്ചതെന്ന് വ്യക്തമാക്കിയിട്ടില്ല.

ഇതോടെ, ഈ വര്‍ഷം ഇറാനില്‍ തൂക്കിലേറ്റിയവരുടെ എണ്ണം 61 ആയി. കഴിഞ്ഞ വര്‍ഷം രാജ്യത്ത് 270 പേരെയാണ് തൂക്കിലേറ്റിയത്

Iran hangs 5 including a woman | ഇറാനില്‍ സ്ത്രീയുള്‍പ്പെടെ അഞ്ചു പേരെ തൂക്കിലേറ്റി

മാണി ആനപ്പുറത്തിരിക്കുന്ന കൊതുക്: പി സി തോമസ്


PRO
ആനപ്പുറത്തിരിക്കുന്ന കൊതുകിന് സമമാണ് കേരള കോണ്‍ഗ്രസ്(എം) നേതാവ് കെ എം മാണിയെന്ന് പി സി തോമസ്. ഒരു സ്വകാര്യവാര്‍ത്താ ചാനലിനോടാണ് തോമസ് ഇങ്ങനെ പറഞ്ഞത്. ആനയുടെ പുറത്തിരിക്കുന്ന കൊതുകിന് ഭാവം താനാണ് വലുതെന്നാണ്. അതുകൊണ്ട് ആദ്യം ആനപ്പുറത്ത് നിന്ന് കൊതുക് താഴെയിറങ്ങി കാര്യങ്ങള്‍ മനസ്സിലാക്കണമെന്നും പി സി തോമസ് പറഞ്ഞു.

ഒറ്റയ്ക്കു മത്സരിക്കുമെന്ന് പറഞ്ഞ കെ എം മാണി പാലായില്‍ ഒറ്റയ്ക്കു മത്സരിക്കാനുള്ള ധൈര്യം കാട്ടണം. മാണി പാലായില്‍ ഒറ്റയ്ക്കു മത്സരിച്ചാല്‍ എത്ര വോട്ടു കിട്ടുമെന്ന് കാണിച്ചു തരാമെന്നും പി സി തോമസ് വെല്ലുവിളിച്ചു. 1979ല്‍ ജനസംഘത്തോടൊപ്പം ചേര്‍ന്ന് മത്സരിച്ച മാണിക്ക് താന്‍ എന്‍ ഡി എയുടെ കൂടെ മത്സരിച്ചതിനെക്കുറിച്ച് പറയാന്‍ അവകാശമില്ലന്നും പി സി പറഞ്ഞു.

തങ്ങളെ മുന്നണിയില്‍ എടുക്കുന്നതിനെ ആര്‍ എസ് പിയും സി പി ഐയും എതിര്‍ത്തിട്ടില്ല. മന്ത്രിസ്ഥാനത്തിന്‍റെ കാര്യം എല്‍ ഡി എഫ് തീരുമാനിക്കും. കൂറുമാറിയ പി ജെ ജോസഫ് ഉള്‍പ്പെടെയുള്ളവരെ അയോഗ്യരാക്കണമെന്ന് ആവശ്യപ്പെട്ട് സ്പീക്കര്‍ക്ക് കത്തു നല്‍കുമെന്നും പി സി തോമസ് അറിയിച്ചു

PC Thomas against to KM Mani | മാണി ആനപ്പുറത്തിരിക്കുന്ന കൊതുക്: പി സി തോമസ്

ഇന്ത്യയില്‍ അമ്മമാര്‍ക്ക് സന്തോഷിക്കാനാവില്ല!


PRO
ലോകം മാതൃദിനം ആഘോഷിക്കുന്ന വേളയില്‍ ഇന്ത്യയിലെ അമ്മമാര്‍ക്കുള്ളത് അത്ര നല്ല വാര്‍ത്തയല്ല. അമ്മമാരുടെ ആരോഗ്യ പരിപാലനത്തിലും ക്ഷേമത്തിലും ലോക രാജ്യങ്ങളുടെ പട്ടികയില്‍ ഇന്ത്യയുടെ സ്ഥാനം പ്രതീക്ഷിക്കാവുന്നതിലും വളരെ താഴെയാണ്.

അമ്മമാര്‍ക്കുള്ള ഏറ്റവും അനുയോജ്യമായ സ്ഥലം തെരഞ്ഞെടുക്കാന്‍ ലോകത്തിലെ 77 രാജ്യങ്ങളെ റേറ്റ് ചെയ്തപ്പോള്‍ ഇന്ത്യയ്ക്ക് എഴുപത്തിമൂന്നാം സ്ഥാനം കൊണ്ട് തൃപ്തിപ്പെടേണ്ടി വന്നു. ‘സേവ് ദ ചില്‍ഡ്രന്‍’ എന്ന സംഘടനയാണ് റേറ്റിംഗ് നടത്തിയത്. ‘സ്റ്റേറ്റ് ഓഫ് വേള്‍ഡ്സ് മദേഴ്സ്’ എന്ന റിപ്പോര്‍ട്ടിലാണ് ഇക്കാര്യം പറയുന്നത്.
ആഭ്യന്തര യുദ്ധവും പട്ടിണിയും താറുമാറാക്കിയ കെനിയ, കോംഗോ തുടങ്ങിയ ആഫ്രിക്കന്‍ രാജ്യങ്ങളെക്കാള്‍ താഴെയാണ് ഇന്ത്യ എന്നുള്ളതാണ് കൂടുതല്‍ ഞെട്ടല്‍ നല്‍കുന്ന സംഗതി.

ക്യൂബയാണ് പട്ടികയില്‍ ഒന്നാമത്. ഇസ്രയേല്‍, അര്‍ജന്റീന, ബാര്‍ബഡോസ്, ദക്ഷിണ കൊറിയ എന്നീ രാജ്യങ്ങളാണ് ക്യൂബയ്ക്ക് തൊട്ടു പിന്നില്‍. അവികസിത രാജ്യങ്ങളുടെ പട്ടികയിലുള്ള ബംഗ്ലാദേശ് പതിനാലാം സ്ഥാനത്തും എത്തി. ചൈന പട്ടികയില്‍ പതിനെട്ടാം സ്ഥാനത്തും ശ്രീലങ്ക നാല്‍പ്പതാം സ്ഥാനത്തും പാകിസ്ഥാന്‍ എഴുപത്തിയഞ്ചാം സ്ഥാനത്തുമാണ്

India not a happy place for mothers: Report | ഇന്ത്യയില്‍ അമ്മമാര്‍ക്ക് സന്തോഷിക്കാനാവില്ല!

കിനാലൂര്‍: സ്ത്രീകള്‍ അടിവാങ്ങാന്‍ കേറിച്ചെന്നെന്ന് വനിതാകമ്മീഷന്‍


PRO
കിനാലൂര്‍ സംഘര്‍ഷത്തില്‍ പൊലീസിന്‍റെ ലാത്തിയടിയേറ്റ് കഴിയുന്ന സ്ത്രീകള്‍ക്കും കുട്ടികള്‍ക്കും വനിതാ കമ്മീഷന്‍റെ രൂക്ഷവിമര്‍ശനം. വനിതാ കമ്മീഷന്‍ അധ്യക്ഷ ജസ്റ്റീസ് ഡി ശ്രീദേവിയാണ് ഒരു സ്വകാര്യ വാര്‍ത്താ ചാനലിനോട് വനിതാ കമ്മീഷന്‍റെ നിലപാട് വ്യക്തമാക്കിയത്. രാഷ്ട്രീയപ്രേരിതമായ സംഭവമായതിനാല്‍ ഇക്കാര്യത്തില്‍ വനിതാ കമ്മീഷന്‍ സ്വമേധയാ കേസ് എടുക്കില്ലെന്നും ശ്രീദേവി വ്യക്തമാക്കി.

കിനാലൂര്‍ സംഭവം വനിതാ കമ്മീഷന്‍റെ ശ്രദ്ധയില്‍പ്പെട്ടിട്ടില്ല. അതുകൊണ്ട് തന്നെ സ്ത്രീകളെ ഉപദ്രവിച്ചിട്ടുണ്ടോ എന്ന കാര്യം അറിയില്ല. അടി കൊള്ളാനായി സ്ത്രീകള്‍ സംഭവ സ്ഥലത്തേക്ക് കേറിച്ചെല്ലുകയായിരുന്നു. അടി കോള്ളാന്‍ കേറിച്ചെന്നാല്‍ അടി കൊള്ളില്ലേ എന്നും അവര്‍ ചോദിച്ചു.

റോഡ് വീതി കൂട്ടുന്നത് നല്ല കാര്യമല്ലേ? അതിനെ എന്തിനാണ് ആളുകള്‍ എതിര്‍ക്കുന്നത്. വനിതാ കമീഷന്‍ ഇടപെടേണ്ട കാര്യം ഒന്നും ഇല്ല. അടികൊണ്ട സ്ത്രീകള്‍ക്ക് അവിടെ ഭൂമിയൊന്നുമില്ല. സമരക്കാര്‍ അടി ചോദിച്ചു വാങ്ങുകയായിരുന്നു. കിനാലൂരില്‍ മറ്റു സ്ഥലങ്ങളില്‍ നിന്ന് ആളെ കൊണ്ടു വരികയായിരുന്നെന്നും ശ്രീദേവി പറഞ്ഞു

ഇന്ത്യയില്‍ പക്ഷാഘാത നിരക്ക് 17 ലക്ഷമാവും

ഇന്ത്യയില്‍ പക്ഷാഘാത നിരക്ക് വര്‍ദ്ധിക്കുന്നതായി റിപ്പോര്‍ട്ട്. 2015 ആവുമ്പോഴേക്കും രാജ്യത്ത് 17 ലക്ഷം ആള്‍ക്കാര്‍ക്ക് പക്ഷാഘാതം ഉണ്ടാവുമെന്നാണ് ഏറ്റവും പുതിയ റിപ്പോര്‍ട്ട്.

രാജ്യത്തെ വിവിധ ആശുപത്രികളില്‍ നിന്ന് ശേഖരിച്ച വിവരങ്ങളുടെ അടിസ്ഥാനത്തിലാണ് റിപ്പോര്‍ട്ട് തയ്യാറാക്കിയത്. പക്ഷാഘാതമേല്‍ക്കുന്ന രോഗികളില്‍ 15 മുതല്‍ 30 ശതമാനം വരെയുള്ളവര്‍ 40 വയസ്സിനു താഴെ മാത്രം പ്രായമുള്ളവരാണെന്നും റിപ്പോര്‍ട്ടില്‍ പറയുന്നു. ‘നാഷണല്‍ കമ്മീഷന്‍ ഓണ്‍ മാക്രോ എക്കണോമിക്സ് ആന്‍ഡ് ഹെല്‍ത്ത്’ തയ്യാറാക്കിയ റിപ്പോര്‍ട്ടിന്റെ അടിസ്ഥാനത്തില്‍ കേന്ദ്ര ആരോഗ്യമന്ത്രാലയമാണ് കണക്കുകള്‍ പുറത്തുവിട്ടത്.

2005 ല്‍ രാജ്യത്ത് 12 ലക്ഷം പക്ഷാഘാത കേസുകളാണ് റിപ്പോര്‍ട്ട് ചെയ്യപ്പെട്ടത്. ഇത് 2015 ആവുമ്പോഴേക്കും 17 ലക്ഷമായി ഉയരുമെന്നാണ് പ്രവചനം

Number of stroke cases likely to touch 17 lakh in 2015 | ഇന്ത്യയില്‍ പക്ഷാഘാത നിരക്ക് 17 ലക്ഷമാവും

സുന്ദരിയായ സ്ത്രീ ഇരയാകുന്ന രസം അവര്‍ണ്യം

ഇത്തവണത്തെ ആഴ്ചമേളയില്‍ സക്കറിയ, മനീഷ കൊയ്‌രാള, ഗാനരചയിതാവ് കൈതപ്രം ദാമോദരന്‍ നമ്പൂതിരി, സിനിമാതാരം അനന്യ, വ്യവസായ മന്ത്രി എളമരം കരീം, മല്ലിക സാരാഭായി എന്നിവര്‍ പങ്കെടുക്കുന്നു.


PRO
“സുനന്ദ പുഷ്കറിന്‍റെ സ്ഥാനത്തു പുരുഷനായിരുന്നെങ്കില്‍ മാധ്യമങ്ങള്‍ എങ്ങനെ പ്രതികരിക്കുമായിരുന്നു? ജരാനരകള്‍ ബാധിച്ച ഒരു വൃദ്ധയായിരുന്നെങ്കിലോ? കാര്യമാത്ര പ്രസക്തമായ അവഗണനയാണ് അത്തരം സന്ദര്‍ഭങ്ങളില്‍ മാധ്യമങ്ങളുടെ വഴി. സുന്ദരിയായ സ്ത്രീയെ ഇരയായി ലഭിക്കുക എന്നതിന്‍റെ രസം അവര്‍ണ്യം തന്നെയാണ്”.

- സക്കറി


PRO
“കൌമാരത്തിന്‍റെ ചോരത്തിളപ്പില്‍ ഞാനും ചിലതു തുറന്നടിച്ചിട്ടുണ്ട്. അനന്തരഫലങ്ങള്‍ അനുഭവിച്ചിട്ടുമുണ്ട്. എന്‍റെ നിലപാടുകള്‍ സമൂഹം നല്ല അര്‍ത്ഥത്തിലല്ല എടുത്തത്. അത്തരം അനുഭവങ്ങളിലൂടെ ഞാന്‍ പാഠങ്ങള്‍ പഠിക്കുകയായിരുന്നു. സമൂഹം അഭിനേതാക്കളെ കാണുന്നത് ഒരുതരം മുന്‍ വിധിയോടെയാണ്. അതൊരു കെണിയാണ്”

- മനീഷ കൊയ്‌രാള


PRO
“കഴിവുള്ള നിരവധി പേര്‍ ഇന്ന് ഗാനരചനാരംഗത്തുണ്ട്. ഉള്ള കഴിവ് നശിപ്പിക്കുന്ന ചിലരുമുണ്ട്. ഉദഹരണത്തിന് കള്ളു കുടിച്ചാലേ പാട്ടും സംഗീതവുമൊക്കെ വരൂ എന്നു കരുതുന്ന ചിലര്‍. അരാജകവാദികളായിരുന്ന ഒരു തലമുറയ്ക്കൊപ്പം യൌവനം ജീവിച്ചു തീര്‍ത്തയാളാണു ഞാന്‍. സുഹൃത്തുക്കളിലധികവും മദ്യപര്‍. എന്നാല്‍ ജീവിതത്തില്‍ ഇന്നുവരെ ഞാന്‍ മദ്യപിച്ചിട്ടില്ല. പാട്ടെഴുതാന്‍ എനിക്ക് കള്ളു കുടിക്കണ്ട.”

- കൈതപ്രം ദാമോദരന്‍ നമ്പൂതിരി


PRO
“എന്‍റെ മോഹം അഭിനയമെന്നതാണ്. മേനി പ്രദര്‍ശനത്തില്‍ തീരെ വിശ്വാസമില്ല. തന്നെയുമല്ല, അങ്ങനെ പ്രദര്‍ശിപ്പിക്കുന്നതിനായുള്ള എക്സ്ട്രാ ഫിറ്റിങ്ങുകളൊന്നും എനിക്കില്ല താനും”

- അനന്


PRO
"മാധ്യമപ്രവര്‍ത്തകര്‍ നിഷ്പക്ഷമായി വാര്‍ത്തകള്‍ എത്തിക്കുന്ന മലക്കുകളാണെന്ന് ധരിക്കരുത്. ടി വി ക്യാമറകള്‍ പലപ്പോഴും വാര്‍ത്തകള്‍ വളച്ചൊടിക്കുകയാണ്. ഒരു മാധ്യമപ്രവര്‍ത്തകനോടും ഞാന്‍ വ്യക്തിപരമായി തെറ്റു ചെയ്തിട്ടില്ല. എന്നിട്ടും ചില മാധ്യമ പ്രവര്‍ത്തകര്‍ സി പി എം ആയി എന്ന ഒറ്റക്കാരണത്താല്‍ എന്നെ വേട്ടയാടുകയാണ്. പല മാധ്യമപ്രവര്‍ത്തകരും അവകാശപ്പെടുന്നത് തങ്ങള്‍ എസ് എഫ് ഐക്കാരായിരുന്നു എന്നാണ്. എന്നാല്‍ അവര്‍ ഇപ്പോള്‍ കെട്ട പാലിനു തുല്യമാണ്”

- എളമരം കരീം, വ്യവസായ മന്ത്രി


PRO
“ഗൌരിയമ്മ, സുഗതകുമാരി, അജിത തുടങ്ങിയവരൊക്കെ നമ്മള്‍ക്കുണ്ട്. പക്ഷേ, പുതിയ തലമുറയില്‍, 55 വയസ്സില്‍ താഴെയുള്ളവരില്‍, ആരാണുള്ളത്? അങ്ങനെയൊരു നേതൃത്വത്തെ കാണാനേയില്ല”.

- മല്ലിക സാരാഭായി

Talk of the week | സുന്ദരിയായ സ്ത്രീ ഇരയാകുന്ന രസം അവര്‍ണ്യം