Thursday, May 27, 2010

പാകിസ്ഥാന്‍ യു ട്യൂബ് വിലക്ക് നീക്കി


PRO
ഇന്‍റര്‍നെറ്റിലെ വീഡിയോ സൈറ്റായ യൂ ട്യൂബിന് ഏര്‍പ്പെടുത്തിയിരുന്ന വിലക്ക് പാകിസ്ഥാന്‍ നീക്കി. എന്നാല്‍ ദൈവവിരുദ്ധ പരാമര്‍ശങ്ങള്‍ ഉണ്ടെന്ന് ചൂണ്ടിക്കാട്ടി യൂ ട്യൂബിലെ നിരവധി പേജുകള്‍ ഇപ്പോഴും ബ്ലോക്ക് ചെയ്തിരിക്കുകയാണ്. പാകിസ്ഥാന്‍ ടെലി കമ്മ്യൂണിക്കേഷന്‍ അതോറിറ്റി വക്താവ് ഖുറാം മെഹ്‌റാന്‍ ആണ് ഇക്കാര്യം അറിയിച്ചത്.

ഇരുന്നൂ‍റിലധികം യൂ ട്യൂബ് ലിങ്കുകള്‍ ബ്ലോക്ക് ചെയ്തിരിക്കുന്നതായാണ് വിവരം. ബ്ലോക്ക് ചെയ്ത ലിങ്കുകളുടെ പട്ടികയും ടെലികമ്മ്യൂണിക്കേഷന്‍ വിഭാഗം പ്രസിദ്ധീകരിച്ചിട്ടുണ്ട്. ഫേസ് ബുക്കില്‍ പ്രവാചകന്‍റെ രേഖാചിത്രം പ്രത്യക്ഷപ്പെട്ടതിനെ തുടര്‍ന്നാണ് പാകിസ്ഥാന്‍ വെബ്സൈറ്റുകള്‍ക്ക് നിരോധനം ഏര്‍പ്പെടുത്തിയത്.

ട്വിറ്റര്‍, ഫേസ് ബുക്ക് തുടങ്ങിയ സോഷ്യല്‍ നെറ്റ്‌വര്‍ക്കിംഗ് സൈറ്റുകളും നിരോധിച്ചിരുന്നു. ഈ സൈറ്റുകള്‍ക്കുള്ള വിലക്ക് ഇനിയും നീക്കിയിട്ടില്ല. വിക്കിപീഡിയയുടെ ഉപയോഗത്തില്‍ നിയന്ത്രണവും വരുത്തിയിരുന്നു. ഫേസ് ബുക്കിനേര്‍പ്പെടുത്തിയ നിയന്ത്രണം ഈ മാസം 31 വരെ നിലനിര്‍ത്തണമെന്ന് ഇത് സംബന്ധിച്ച കേസ് പരിഗണിക്കുന്ന ലാഹോര്‍ കോടതി സര്‍ക്കാരിനോട് ഉത്തരവിട്ടിട്ടുണ്ട്.

ദൈവനിന്ദാപരമായ പരാമര്‍ശങ്ങളടങ്ങിയ ലിങ്കുകളുടെ വിലക്ക് തുടരുമെന്നും എന്നാല്‍ മറ്റ് ലിങ്കുകളില്‍ സൈറ്റുകളുടെ സേവനം ലഭ്യമാക്കാന്‍ ഏതാനും ദിവസങ്ങള്‍ക്കുള്ളില്‍ നടപടി സ്വീകരിക്കുമെന്നും പാക് ആഭ്യന്തരമന്ത്രി റഹ്‌മാന്‍ മാലിക് കഴിഞ്ഞ ദിവസം ഉറപ്പുനല്‍കിയിരുന്നു. ഫേസ് ബുക്കിലെ ചിത്രം ഇസ്ലാമിക സംഘടനകളുടെയും പ്രതിഷേധത്തിനിടയാക്കിയിരുന്നു. തുടര്‍ന്നാണ് പാകിസ്ഥാന്‍ കടുത്ത നടപടിക്ക് മുതിര്‍ന്നത്

Pakistan lifts ban on YouTube | പാകിസ്ഥാന്‍ യു ട്യൂബ് വിലക്ക് നീക്കി

No comments: