Thursday, May 6, 2010

ഹൂട്ടണ്‍ തുടരണമെന്ന് ബൂട്ടിയ


PRO
ഇന്ത്യന്‍ ഫൂട്ബോള്‍ ടീം പരിശീലകനായി ബോബ് ഹൂട്ടണ്‍ തുടരണമെന്ന് നായകന്‍ ബൈച്ചുംഗ് ബൂട്ടിയ. ഫെഡറേഷനില്‍ നിന്ന് വേണ്ട സഹകരണം ലഭിക്കാത്തതിനാലാണ് ഹൂട്ടണ്‍ രാജിവെച്ചതെന്നും ബൂട്ടിയ പറഞ്ഞു. ഇന്ത്യന്‍ ഫുട്ബോളിനെ സ്നേഹിക്കുന്നവരെല്ലാം ഹുട്ടന്‍റെ പുറകിലുണ്ട്. അദ്ദേഹം പരിശീലകനായി തുടരണമെന്നാണ് ഞങ്ങളുടെ ആവശ്യം. ഫെഡറേഷന്‍ അധികൃതരില്‍ നിന്ന് ഹൂട്ടണ് ആവശ്യമായ പിന്തുണ ലഭിക്കാത്തത് നിര്‍ഭാഗ്യകരമാണെന്നും ബൂട്ടിയ പറഞ്ഞു.

ഇന്ത്യന്‍ ഫുട്ബോളിനെ പുതിയ തലത്തിലേക്ക് നയിച്ച ഹൂട്ടണ്‍ പരിശീലകനായിരിന്നപ്പോഴാണ് ഇന്ത്യയ്ക്ക് 24 വര്‍ഷത്തിനുശേഷം ഏഷ്യാ കപ്പിന് യോഗ്യത നേടാന്‍ കഴിഞ്ഞത്. ഇന്നലെയാണ് ഹൂട്ടണ്‍ രാജിവെച്ചെന്ന അഭ്യൂഹം പരന്നത്. എന്നാല്‍ ഓള്‍ ഇന്ത്യ ഫുട്‌ബോള്‍ ഫെഡറേഷന്‍ പ്രസിഡന്‍റും കേന്ദ്ര മന്ത്രിയുമായ പ്രഫുല്‍പട്ടേല്‍ ഇത് നിഷേധിക്കുകയായിരുന്നു.

കരാര്‍ നീട്ടാത്തതിലും വേതനം വര്‍ധിപ്പിക്കാത്തതിലും പ്രതിഷേധിച്ച് ഹൂട്ടണ്‍ രാജി നല്‍കിയെന്നായിരുന്നു റിപ്പോര്‍ട്ടുകള്‍. അടുത്തവര്‍ഷം ജനുവരിയില്‍ ദോഹയില്‍ നടക്കുന്ന ഏഷ്യന്‍കപ്പ് വരെയാണ് ഹൂട്ടണുമായി കരാറുള്ളത്. ഇംഗ്ലീഷ് കോച്ചിന്റെ ഏജന്റിനോട് മറ്റൊരു പരിശീലകനെ അന്വേഷിക്കാന്‍ ഫെഡറേഷന്‍ സെക്രട്ടറി ആല്‍ബര്‍ട്ടൊ കൊളാസോ ആവശ്യപ്പെട്ടതാണ് ഹൂട്ടനെ പ്രകോപിപ്പിച്ചതെന്നാണ് സൂചന.

കരാര്‍ 2013 വരെ ദീര്‍ഘിപ്പിക്കാനും മാസം 10,000 ഡോളര്‍ ശമ്പളവര്‍ധനയും ഹൂട്ടന്‍ ആവശ്യപ്പെട്ടെന്നും അഭ്യൂഹമുണ്ട്. 2,40,000 ഡോളറാണ് (ഏകദേശം ഒരു കോടി ഏഴു ലക്ഷം രൂപ) ഹൂട്ടന്റെ വാര്‍ഷിക ശമ്പളം. ഹൂട്ടന്‍ സ്ഥാനമൊഴിയുകയാണെങ്കില്‍ ഇന്ത്യയുടെ ഏഷ്യന്‍ ചാമ്പ്യന്‍ഷിപ്പ് ഒരുക്കങ്ങള്‍ക്ക് വന്‍ തിരിച്ചടി നേരിടും. 2006-ല്‍ മുന്‍ ഫുള്‍ഹാം മിഡ്ഫീല്‍ഡര്‍ പരിശീലകനായ ശേഷം മികച്ച പ്രകടനമാണ് ഇന്ത്യ നടത്തിയത്. രണ്ടുതവണ നെഹ്രുകപ്പില്‍ ടീം ചാമ്പ്യന്മാരായി. ഏഷ്യന്‍ ചാലഞ്ച് കപ്പ് വിജയിച്ച് 24 വര്‍ഷത്തിനു ശേഷം ഇന്ത്യയ്ക്ക് ഏഷ്യന്‍ ചാമ്പ്യന്‍ഷിപ്പിന് യോഗ്യത നേടിക്കൊടുക്കാനും ഹൂട്ടനായി

Bhutia wants coach to stay | ഹൂട്ടണ്‍ തുടരണമെന്ന് ബൂട്ടിയ

No comments: