Saturday, April 17, 2010

തരൂരിനെ തിരുവനന്തപുരം പിന്തുണയ്ക്കും, കോണ്‍ഗ്രസ്സോ?

ഒരു ഉദ്യോഗസ്ഥ പ്രമുഖന് രാഷ്ട്രീയത്തിന്റെ കുപ്പായത്തില്‍ കൂടുതല്‍ സമയം സുഖമായി കഴിയാന്‍ സാധിക്കില്ല എന്ന് ശശിതരൂര്‍ പലതവണ തെളിയിച്ചു കഴിഞ്ഞു. എന്നാല്‍, തരൂരിനെ ജയിപ്പിച്ചു വിട്ട തിരുവനന്തപുരത്തെ ജനങ്ങളില്‍ ഭൂരിഭാഗവും ഐപി‌എല്‍ വിവാദം കാരണം അദ്ദേഹം രാജിവയ്ക്കണമെന്ന് ആഗ്രഹിക്കുന്നില്ല എന്നാണ് ഒരു പ്രമുഖ ദിനപ്പത്രം പുറത്തുവിട്ട സര്‍വേ വെളിപ്പെടുത്തുന്നത്.

ഗാന്ധിജിയുടെ പേരില്‍ മോണ്ട് ബ്ലാങ്ക് കമ്പനി ലക്ഷങ്ങള്‍ വിലയുള്ള ആഡംബര പേന പുറത്തിറക്കിയപ്പോള്‍ അതിനെതിരെ കേരളം പ്രതികരിച്ചതു പോലെ തരൂര്‍ വിവാദത്തില്‍ കേരളം പ്രതികരിക്കണമെന്നില്ല എന്ന് തന്നെയാണ് ഈ സര്‍വെ ഫലം സൂചിപ്പിക്കുന്നത്. എന്നാല്‍, ഒരു കോണ്‍ഗ്രസ് മന്ത്രി കോടിക്കണക്കിന് രൂപ വാരിയെറിഞ്ഞ് ഒരു ഐപി‌എല്‍ ടീമിനെ സ്വന്തം സംസ്ഥാനത്തേക്ക് കൊണ്ടുവന്നു എന്ന ആരോപണം പാര്‍ട്ടിക്ക് അത്ര ദഹിച്ച മട്ടില്ല.

ഐപി‌എല്‍ കൊച്ചിക്ക് നേടിക്കൊടുത്തത് സ്വന്തം മണ്ഡലത്തിന് നല്‍കിയ സംഭാവനയാണെന്ന് തിരുവനന്തപുരം സ്വദേശികള്‍ കരുതുന്നില്ല. എന്നാല്‍, സര്‍വെയില്‍ പങ്കെടുത്ത 57 ശതമാനം ആളുകളും തരൂര്‍ ചതിയനല്ല എന്നും രാജിവയ്ക്കേണ്ടതില്ല എന്നും പറയുന്നു. ഐപി‌എല്‍ മേധാവി ലളിത് മോഡിക്ക് കേരളത്തിലും അത്ര നല്ല പേരല്ല എന്നും സര്‍വെ വെളിപ്പെടുത്തുന്നു. സര്‍വേയില്‍ പങ്കെടുത്ത 70 ശതമാനവും ഐപി‌എല്‍ വിവാദം ലളിത് മോഡിയും തരൂരും തമ്മിലുള്ള പ്രശ്നമാണെന്നും ലളിത് മോഡിയെ ഔദ്യോഗിക പദവിയില്‍ നിന്ന് നീക്കണമെന്നും ആവശ്യപ്പെടുന്നു.

TVM backs Tharoor but Congress | തരൂരിനെ തിരുവനന്തപുരം പിന്തുണയ്ക്കും, കോണ്‍ഗ്രസ്സോ?

No comments: