Thursday, April 15, 2010

സുനന്ദ പുഷ്കറെന്ന കശ്മീര്‍ സുന്ദരിയാര്?

ശശി തരൂരിനിട്ട് ലളിത് മോഡി വച്ച ആപ്പായിരുന്നു സുനന്ദ പുഷ്കറെന്ന കശ്മീരി സുന്ദരി. റാങ്ദെവൂ കണ്‍സോര്‍ഷ്യം സ്വന്തമാക്കിയ കൊച്ചി ഐപിഎല്‍ ടീമില്‍ കേന്ദ്ര വിദേശകാര്യ സഹമന്ത്രി ശശി തരൂരിന്‍റെ ഭാവിവധു സുനന്ദ പുഷ്കറിന് 18 ശതമാനം ഓഹരിയുണ്ടെന്നാണ് ലളിത് മോഡി ട്വിറ്ററിലൂടെ കാച്ചിയത്. തുടര്‍ന്നങ്ങോട്ട് സുനന്ദ പുഷ്കറെന്ന ‘ബിസിനസ് സുന്ദരി’ ആരാണെന്നറിയാനുള്ള നെട്ടോട്ടത്തിലായി മാധ്യമങ്ങള്‍.

തീവ്രവാദി ആക്രമണത്തെ തുടര്‍ന്നു കാശ്‌മീര്‍ താഴ്‌വരയിലെ ബൊമ്മൈയില്‍നിന്ന്‌ 1990-ല്‍ ജമ്മുവിലേക്കു കുടിയേറിയ കുടുംബത്തിലെ അംഗമാണ് സുനന്ദ. പിതാവ് റിട്ടയേര്‍ഡ്‌ സൈനിക ഓഫിസറായ ലഫ്. കേണല്‍ പുഷ്കര്‍ ദാസ്. ഇവര്‍ക്ക്‌ ജമ്മുവില്‍ സ്വന്തം റിസോര്‍ട്ടുണ്ട്‌. വന്‍ ബിസിനസ് ഇടപാടുകള്‍ നടത്തിക്കൊടുക്കുന്ന ജോലിയാണ് ഇപ്പോള്‍ ഈ നാല്‍‌പ്പത്തിയൊന്നുകാരിക്ക്.

കഴിഞ്ഞ മാര്‍ച്ചില്‍ ബിസിനസ്‌ ചേംബറായ ഫിക്കി സംഘടിപ്പിച്ച ട്വന്റി20 മല്‍സരത്തിനിടെ ശശി തരൂരിന്റെ ഒരു ഷോട്ടിനെ കൈയടിച്ച് പ്രോല്‍സാഹിപ്പിച്ച സുനന്ദയുടെ ചിത്രം മാധ്യമങ്ങളില്‍ വരികയുണ്ടായി. രണ്ടുമാസം മുമ്പ്‌ ഡല്‍ഹിയില്‍ കോണ്‍ഗ്രസ്‌ നേതാവ്‌ ജിതിന്‍ പ്രസാദയുടെ വിവാഹച്ചടങ്ങില്‍ പ്രത്യക്ഷപ്പെട്ടപ്പോഴാണ് സുനന്ദ ശരിക്കും മാധ്യമശ്രദ്ധ നേടിയെടുത്തത്. ചുവപ്പുസാരിയും ബ്ലെസും ധരിച്ച് വളരെ ഗ്ലാമറസായി ശശി തരൂരിനൊപ്പം പ്രത്യക്ഷപ്പെട്ട ഈ കശ്മീര്‍ സുന്ദരിയെ ക്യാമറക്കണ്ണുകള്‍ ആര്‍ത്തിയോടെ ഒപ്പിയെടുക്കുകയായിരുന്നു.

Who is this Kashmiri beauty, Sunanda Pushkar? | സുനന്ദ പുഷ്കറെന്ന കശ്മീര്‍ സുന്ദരിയാര്?

No comments: