Friday, April 16, 2010

സിനിമയെക്കുറിച്ച്‌ വീണ്ടും

മലയാള സിനിമ പ്രതിസന്ധിയിലൂടെ കടന്നു പോകുകയാണെന്നാണ്‌ സിനിമാ മേഖലയുമായി ബന്ധപ്പെട്ടവരുടെ അവകാശം. ഇറങ്ങുന്ന സിനിമകളൊന്നും വിജയിക്കുന്നില്ല. കോടികള്‍ മുടക്കി സിനിമ നിര്‍മിച്ച്‌ അത്‌ തീയറ്ററിലെത്തിക്കഴിഞ്ഞാല്‍ സിനിമ കാണാന്‍ ആളുകയറുന്നില്ല. വന്‍ നഷ്ടം അനുഭവിക്കുന്ന നിര്‍മാതാവ്‌ ആത്മഹത്യയുടെ വക്കിലെത്തുന്നു. പുറമേ ആഡംബരം കാട്ടുന്ന പല നിര്‍മാതാക്കളുടെയും അവസ്ഥ ദയനീയമായ ഗുരുതരസ്ഥിതിയിലാണ്‌. 

കാര്യങ്ങള്‍ ഗുരുതരാവസ്ഥയിലാണെങ്കിലും നിരവധി സിനിമകള്‍ ഓരോ വെള്ളിയാഴ്ചകളിലും തീയറ്ററുകളിലെത്തുന്നുണ്ട്‌. ഒരു മലയാള സിനിമയെങ്കിലും പുതുതായി എത്താത്ത വെള്ളിയാഴ്ചകളില്ല. ഇത്രയൊക്കെ നഷ്ടം സഹിച്ച്‌ പ്രേക്ഷകരെ സഹായിക്കാനാണോ നിര്‍മാതാക്കള്‍ സിനിമ ഉണ്ടാക്കുന്നത്‌?. സിനിമാ നിര്‍മാണത്തിന്റെ ചെലവ്‌ ദിനംപ്രതി ഉയര്‍ന്നു വരികയാണെന്നാണ്‌ നിര്‍മാതാക്കള്‍ പറയുന്നത്‌. ചെലവേറ്റി സിനിമ നിര്‍മിക്കുന്നതിനെതിരെ നിര്‍മാതാക്കളുടെ സംഘടന രംഗത്തു വന്നു കഴിഞ്ഞു. സിനിമാ മേഖലയിലുള്ള എല്ലാവര്‍ക്കും തൊഴിലാളി സംഘടനകള്‍ കൂടിയായതോടെ അവരുടെ അവകാശങ്ങള്‍ സംരക്ഷിക്കേണ്ട മുതലാളി കൂടിയായി നിര്‍മാതാക്കള്‍ മാറി. കൂലി കൂടുതല്‍ ചോദിക്കാനും നല്ല കൂലി നല്‍കിയില്ലെങ്കില്‍ ചിത്രീകരണം നിര്‍ത്തി നിര്‍മ്മാതാവിനു നഷ്ടം വരുത്താനും സിനിമാ വ്യവസായത്തിലെ വിവിധ തൊഴിലാളി സംഘടനകള്‍(താര സംഘടനകളല്ല) തയ്യാറാകുന്നു. താര സംഘടനകള്‍ക്ക്‌ കൂലി കൂട്ടി ചോദിക്കേണ്ട അവസ്ഥ വരുന്നില്ല. ഇപ്പോള്‍ എല്ലാ തരം സംഘടനകളെയും നയിക്കുന്നതും അവരുടെ നയങ്ങള്‍ രൂപപ്പെടുത്തുന്നതും ഈ താരങ്ങളുടെ 'കോക്കസ്സാ'ണ്‌. പാവം നിര്‍മാതാവ്‌ താരങ്ങളെന്ന തൊഴിലാളി വിഭാഗത്തിന്റെ പിറകേ നടക്കേണ്ടി വരുന്നു.

താര കേന്ദ്രീകൃതമാണ്‌ കേരളത്തിലെ സിനിമാ വ്യവസായം. അവര്‍ എല്ലാം നിശ്ചയിക്കുന്നു. അങ്ങനെ അല്ലെന്ന്‌ ആരൊക്കെ പറഞ്ഞാലും സത്യം അതാണ്‌. താരങ്ങള്‍ അവര്‍ക്കു വേണ്ടി, അല്ലെങ്കില്‍ അവരുടെ താല്‍പര്യങ്ങള്‍ സംരക്ഷിച്ചാണ്‌ കാര്യങ്ങള്‍ നടപ്പാക്കുന്നത്‌. താഴെ തട്ടില്‍ പാത്രംകഴുകുന്നവര്‍ മുതല്‍ സൂപ്പര്‍ താരങ്ങള്‍ വരെ ഒത്തൊരുമിച്ച്‌ പ്രവര്‍ത്തിച്ച്‌ രൂപപ്പെടുന്നതാണ്‌ സിനിമ. എന്നാല്‍ ആരും താഴെ തട്ടിലുള്ളവരെ കണ്ടതായി ഭാവിക്കുന്നില്ല. നടീനടന്മാരുടെയും പ്രധാനപ്പെട്ട സാങ്കേതിക വിദഗ്ധരുടെയും താല്‍പര്യങ്ങള്‍ മാത്രം സംരക്ഷിക്കപ്പെടുന്നു. മറ്റുള്ളവര്‍ക്ക്‌ കാര്യമായി പ്രതിഫലം ലഭിക്കുന്നില്ല. അവര്‍ക്ക്‌ ശബ്ദിക്കാനുള്ള അവസരം ഉണ്ടായിരുന്നില്ല. അപ്പോഴാണ്‌ സംഘടനകൊണ്ട്‌ ശക്തരാകാന്‍ തീരുമാനിച്ചത്‌. എന്നാല്‍ സംഘടന ശക്തമായപ്പോള്‍ പ്രശ്നങ്ങളും ഉടലെടുത്തു. അവകാശങ്ങളും അനാവശ്യങ്ങളും ഒരുപോലെ ചോദിച്ചു വാങ്ങാന്‍ തുടങ്ങിയപ്പോള്‍ മറ്റേതു വ്യവസായത്തേയും പോലെ സിനിമാ വ്യവസായവും പ്രതിസന്ധിയിലേക്കു നീങ്ങി. 

http://www.janmabhumidaily.com/detailed-story?newsID=55040

No comments: